Persbericht

Delegashonnan tékniko di Konsehonan Sosial-Ekonómiko (SER) di Kòrsou i Sint Maarten ta komprometé nan mes pa intensifiká kooperashon institushonal

Estrechá lasonan di kooperashon riba nivel institushonal i organisá konhuntamente charlanan, simposia i tayernan riba temanan sosial-ekonómiko aktual i relevante pa paisnan di Reino den Karibe.
Esaki ta algun di e palabrashonnan ku e delegashonnan tékniko di e Konsehonan Sosial Ekonómiko (SER) di Kòrsou i Sint Maarten a yega ku otro durante un enkuentro di trabou ku a tuma lugá djaluna 9 di aprel mainta den sala di reunion di SER di Kòrsou na Ansinghstraat.
Durante e enkuentro aki, SER di Sint Maarten tabata representá pa su direktor/sekretario-general sr. Gerard Richardson, kompañá pa un konsehero hurídiko sra. Daniële F. Choennie-Babel. Di parti di SER Kòrsou tabata presente sr. Raúl Henriquez, ku djamars dia 3 di aprel último a hasi un bishita di kortesia na SER Sint Maarten, i e konseheronan sra. Sharlyn Villareal-Curial, sra. Miloushka Sboui-Racamy, sra. Sonja Boersma i sra. Ingrid Bernadina-Provence.
E delegashonnan a ekspresá nan deseo i boluntat pa fomentá mas interkambio riba nivel institushonal, pa siña di otro i pa organisá proyekto- i programanan konhuntamente.
A papia riba e posibilidat pa a korto plaso organisá un simposio, huntu ku SER di Aruba, riba e tema di índokumentanan, migrashon ilegal i refugiadonan, ku pa tur tres pais i pa hinter Reino ta relevante aktualmente, konsiderando e implikashonnan sosial-ekonómiko serio ku e desaroyo aki tin.
Mas aleu a interkambiá di idea ku otro riba e ambishon di SER Kòrsou pa sigui reforsá lasonan di kooperashon regional den kuadro di e ret CESALC (Consejos Económicos y Sociales de América Latina y del Caribe) i tambe mundial den kuadro di e Asosashon Internashonal di Konsehonan Sosial Ekonómiko i Institutonan Similar (AICESIS).
SER di Sint Maarten a ekspresá enfátikamente ku e ta kompartí e vishon aki.

Riba e foto: e delegashonnan tékniko den kombersashon ku otro.

Share