Studiantenan di Universidat di Hasselt a bishitá SER den kuadro di programa di interkambio tokante promoshon di eksportashon

Willemstad, 3 di yüli 2026 – Konseho Sosial-Ekonómiko (SER) a risibí resientemente un grupo di studiante di Universidat di Hasselt na Bélgika pa un bishita di konosementu i interkambio. E bishita tabata forma parti di un programa di interkambio di dos siman na Kòrsou, kaminda e studiantenan, riba enkargo di Ministerio di Desaroyo Ekonómiko, ta traha riba un plan pa fortalesé e kapasidat di eksportashon di Kòrsou.

E programa di interkambio ta ofresé studiantenan oportunidat pa konektá nan konosementu teóriko ku e práktika di Kòrsou. Pa medio di kombersashonnan, bishitanan di trabou i seshonnan di kontenido, nan ta haña un bista mas amplio di e konteksto ekonómiko, institushonal i sosial di e pais. Banda di nan enkargo tokante promoshon di eksportashon, e studiantenan ta bishitá diferente organisashon ku tin un papel importante den desaroyo di ekonomia di Kòrsou.

Durante e bishita na SER, tres tema tabata sentral: e relashonnan konstitushonal den Reino Hulandes, e tarea i forma di traha di SER Kòrsou, i e situashon sosial-ekonómiko aktual di pais. Den e kuadro aki a papia, entre otro, tokante posishon di Kòrsou komo pais outónomo den Reino, e importansia di konsultashon i konseho den proseso di formulashon di maneho, i e desafionan ekonómiko i sosial prinsipal ku Kòrsou ta enfrentá.

Un parti importante di e enkuentro tabata e splikashon di e papel di SER komo órgano independiente di konseho pa Gobièrnu i Parlamento. E studiantenan a haña informashon tokante e komposishon tripartito di e konseho, kaminda representantenan di dunadónan di trabou, trahadónan i ekspertonan independiente ta deliberá huntu riba asuntunan sosial-ekonómiko. Tambe a duna atenshon na e proseso di konseho i na e manera ku SER ta kontribuí na formashon di polítika ku sosten amplio riba temanan ku ta importante pa komunidat.

Ademas, a duna atenshon na e struktura sosial-ekonómiko mas amplio di Kòrsou. Temanan manera desaroyo demográfiko, desafionan riba merkado laboral, diversifikashon ekonómiko, kompetitividat i e posishon di Kòrsou komo un ekonomia chikí i habrí a keda tratá den perspektiva di promoshon di eksportashon. E enkuentro a mustra ku stimulashon di eksportashon no por keda separá di produktividat, e spiritu empresarial, kapasidat institushonal i posishonamentu internashonal.

Pa e studiantenan, e bishita na SER a duna nan oportunidat pa pone nan enkargo den un kuadro mas amplio di maneho i sosiedat. Desaroyo di eksportashon no ta rekerí solamente análisis di merkado i strategia ekonómiko. E ta rekerí tambe komprenshon di relashonnan gubernamental, interesnan sosial i kondishonnan di maneho públiko ku ta determiná kresementu ekonómiko sostenibel di Kòrsou.

Ku e enkuentro ku e studiantenan, SER ta kontribuí na interkambio di konosementu entre Kòrsou i institutonan internashonal di enseñansa avansá. Enkuentronan asina ta brinda e studiantenan eksperensia práktiko di balor i, na mes momento, ta fortalesé e diálogo tokante futuro di ekonomia di Kòrsou.

SER ta mira bèk ku satisfakshon riba e bishita i ta subrayá importansia di kooperashon entre enseñansa, Gobièrnu i organisashonnan sosial. Presisamente dor di konektá teoria ku práktika, por surgi perspektivanan nobo ku por kontribuí na un desaroyo sosial-ekonómiko sostenibel.

Met het ontvangen van de studenten levert de SER een bijdrage aan kennisuitwisseling tussen Curaçao en internationale onderwijsinstellingen. Dergelijke ontmoetingen bieden studenten waardevolle praktijkervaring en versterken tegelijkertijd de dialoog over de toekomst van de Curaçaose economie.

De SER kijkt positief terug op het bezoek en benadrukt het belang van samenwerking tussen onderwijs, overheid en maatschappelijke organisaties. Juist door theorie en praktijk met elkaar te verbinden, ontstaan nieuwe inzichten die kunnen bijdragen aan duurzame sociaaleconomische ontwikkeling.