Minister di SOAW ta informá SER tokante kambionan proponé den asistensia sosial

Willemstad, 10 di ougùstùs 2026 – Djabièrnè 7 di ougùstùs último, minister di Desaroyo Sosial, Labor i Bienestar (SOAW), señora Charetti America-Francisca, durante un reunion ekstraordinario a duna Konseho Sosial-Ekonómiko (SER) un splikashon tokante dos proyekto di regulashon ku ta estrechamente relashoná ku otro i ku ta regardá asistensia sosial general.

E proposishonnan ta enserá un proyekto di ordenansa nashonal pa kambia e Ordenansa di Kòrsou pa Otorgamentu di Asistensia Sosial 2008 i un proyekto di dekreto nashonal ku medida general pa ehekutá artíkulo 14, insiso tres, dje ordenansa ei. Entre otro, e regulashonnan proponé ta relashoná ku adaptashon di e normanan di asistensia sosial i dje montante máksimo di asistensia sosial general stipulá pa lei.

Durante e reunion, minister, asistí pa su konseheronan, a duna SER informashon adishonal tokante e antesedentenan i ophetivonan di e proposishonnan, e konstrukshon hurídiko skohé, nan konsekuensia finansiero i e aspektonan relatá ku nan ehekushon. Despues, e miembronan di SER a hasi preguntanan pa haña mas klarifikashon i a interkambiá punto di bista ku minister.

E splikashon tabata di karakter informativo. SER lo tene kuenta ku e informashon suministrá den su deliberashonnan posterior i konforme su mandato legal, lo emití su konseho na Gobièrnu di manera outónomo independiente.