Preguntanan mas hasí

Kuantu tempu SER ta tuma pa traha un rapòrt/ konseho?

SER no ta mará legalmente na un sierto término di tempu. Sin embargo SER ta interesá pa desaroyá konsehonan balansá, bon motivá i responsabel. Pa presentá un konseho mester hasi un estudio prelimar profundo, esaki e konseheronan di e órgano di estado di Ofisina di Sekretariado ta hasi pa sostené e Konseho. Dependiendo di e índole i e kontenido di e petishon esakí por tuma mas òf ménos tempu.

Na 2017 e konsultanan a bai generalmente lihé i a varia di 5 dia (den kaso di un petishon pa un konseho urgente) te ku 4,5 siman. E periodo promedio di konseho ta 2,5 siman. E rapides ku ta duna konseho en komparashon ku añanan anterior (kaminda e promedio di tempu tabata 2,5-3 luna), ta debí spesialmente na e tipo di petishonnan.

Gobièrnu mester pidi konseho riba tur tópiko sosio-ekonómiko?

E artíkulo 2 di e Ordenansa SER ta stipulá ku e Konseho tin komo tarea duna Gobièrnu i Parlamento konseho en general di e maneho sosio-ekonómiko, asuntonan di karakter sosio-ekonómiko i tokante regulashonnan legal di índole sosio-ekonómiko. Ku esaki Gobièrnu ta obligá di pidi SER konseho riba tur intenshonnan importante riba tereno sosio-ekonómiko. Si a pidi e Hunta un konsulta riba un tópiko ku e sí ta haña importante, SER por disidí di duna un konseho tòg. Esaki yama konseho di inisiativa. Un konseho di inisiativa spesialmente tin sentido si delantá ta bisto ku por yega na un konseho unánime.

Otronan tambe por pidi e Hunta pa konseho?

Si, por. For di 25 di ougùstùs 2017 aparte di Gobièrnu, Parlamento tambe, via di su presidente, por pidi SER pa konseho. Na yanüari 2018 SER  a risibí e promé petishon den e kategoria akí. E petishon ta trata di dos Ordenansa inisiativo tokante respektivamente e kambio di e Ordenansa di AOV (kambio di e método di indeksá) i e introdukshon di un penshun básiko obligatorio.

Kon e nombramentu di miembronan den SER ta tuma lugá?

Den un dekreto gubernamental, ku ta kontené medidanan general, ta stipulá un perfil pa e miembronan i e miembronan suplente di e Hunta. E miembronan i miembronan suplente ta wòrdu nombrá pa medio di un dekreto gubernamental.

Miembronan independiente ta wòrdu nombrá riba rekomendashon di SER. Nombramentu di miembronan di trahadó i empresa ta un asunto di sindikato i organisashon di empresarionan sentral mes. Nan ta determiná ken ta bai sinta komo nan represente di nan organisashon den SER.

E miembronan den SER ta sin kargo òf sin konsulta.

Kiko ta e ròl di e miembronan independiente?

E miembronan independiente ta ekspertonan independiente, ku nan diferente área di ekspertisio. Nan no ta representá Gobièrnu. Nan ta den SER sin kargo i sin konsulta. Nan tarea ta pa sirbi interes general. Ademas, nan ta aktua tambe komo mediadó ora trahadónan i doño di trabou no por haña otro. E akuerdonan akí ta kompromisonan ku e miembronan independiente ta formulá. Ora ta forma grupo di miembronan independiente ta importante ku disiplinanan sientífiko relevante ta representá.

Kon SER ta traha na ampliá e sosten sosial riba tópikonan riba tereno sosio-ekonómiko?

Pa tópikonan ku ta kai for di e área tradishonal sosio-ekonómiko, e kontribushon di otro gruponan por ta importante. Di e forma akí un konseho ta optené kalidat i sosten. Ta enbolbe Organisashonnan ku tin konosementu spesífiko riba e tereno konserní òf ku tin un perspektiva spesífiko den un área relevante òf ku ta representá un interes spesífiko, den un komishon pa prepará un konseho. Sin embargo, nan no ta bira miembro di e Hunta i pa e motibu ei nan no tin niun aporte ni partisipashon den aprobashon formal di e konseho.

Ta eksistí órganonan di SER den eksterior tambe?

Rònt mundu tin Konsehonan Sosial-Ekonómiko i institutonan similar. Dia 1 di yüli 1999 – riba inisiativa tambe di SER di Ulanda- nan a funda e Asosiashon Internashonal di Konsehonan Sosial-Ekonómiko i Institutonan Similar (AICESIS). Meta di e asosiashon ta pa interkambiá eksperensianan ku otro i pa promové lantamentu di Konsehonan Sosial-Ekonómiko i instansianan similar den otro paisnan tambe. E asosiashon tin miembronan na Oropa, Afrika, Asia i Amérika Latina. Kòrsou, República Dominikana i Brasil ta representá Karibe i Amérika Latina den e AICESIS durante e periodo di 2021 – 2023. Ademas SER-Curaçao ta e Sekretario General suplente pa e region Amérika Latina i Karibe pa e periodo di 2021 te ku 2023.