Komunikado

Durante e reunion general di AICESIS na Rumania  

SER Curaçao reelegí komo miembro di direktiva di asosiashon internashonal di kolegio di konseho sosial-ekonómiko

Bukarèst, 11 di òktober 2019 – E Konseho Sosial-Ekonómiko di Kòrsou (SER) a wòrdu reeligí komo miembro di direktiva di AICESIS pa e periodo 2019-2021 durante e di 18 reunion general di e asosiashon internashonal di kolegio di konsehonan sosial-ekonómiko i institutonan similar AICESIS, ku a tuma lugá riba 9 i 10 di òktober último na e kapital di Rumania, Bukarèst i ku tambe tabata dediká na e selebrashon di binti añanan di eksistensia di e asosiashon. Tambe SER a mantené su posishon komo sekretario-general interino di AICESIS pa e region di Amérika Latino i Karibe pa e mesun periodo. Komo representantenan di SER Kòrsou tabata presente e presidente den funshon John Jacobs, sekretario general Raul Henriquez i konsehero mayó Miloushka Sboui-Racamy.

E region di Amérika Latino i Karibe a wòrdu representá pa miembronan di delegashon di Santo Domingo, Guatemala, Aruba i St.Maarten.

E reunion general na Bukarèst, kaminda mas ku sinkuenta pais a partisipá i ku tambe a konta ku presensia di opservadornan di entre otro e Organisashon di Labor Internashonal (ILO) i e Konseho Sosial-Ekonómiko di Nashonnan Uní (ECOSOC), tambe a tuma lugá  e traspaso di e presidensia oropeo di AICESIS pa Afrika. E statutonan di AICESIS ta stipulá ku e presidensia, tin un durashon di dos aña, i ta rotativo entre e kontinentenan. Pa e periodo di 2019-2021 e honor a kai pa Wèst-Afrika Kosta Marfil. Tambe a elegí un direktiva nobo di AICESIS i a apuntá nan sekretarionan general interino nobo pa kada parti di mundo.

Den su diskurso di despedida e presidente di AICESIS, e romano Iacob Baciu, a señalá e importansia di kontinuidat di e aktividatnan di AICESIS ku a demostrá su balor komo un órgano internashonal rekonosé,  kaminda órganonan di konsehonan sosial-ekonómiko nashonal i institutonan similar basá riba igualdat i ekivalensia, ta hiba diálogo ku otro riba temanan aktual sosial ekonómiko i ta kompartí ku otro mihó práktikanan. Pa un kompilashon di tur e aktividatnan durante e presidensia romano klek akí.

Den su diskurso di despedida Baciu a enfatisá tambe ku durante su presidensia e diskushonnan denter di konstelashon di AICESIS tabata primordialmente konsentrá rondó di e tema digitalisashon i e konsekuensianan pa humanidat, e tema ku el a skohe den 2017 pa su periodo di mandato di dos aña komo presidente di AICESIS. Kuminsamentu di mart di e aña akí durante di e reunion di direktiva anual ku a tuma lugá na Willemstad, Kòrsou, e tema a wòrdu aserká for di diferente ángulo, siguí pa un tayer internashonal kaminda a kompartí tambe e mihó práktikanan. Práktikamente tur parti di mundo tabata bon representá na e reunion di direktiva i e tayer internashonal kaminda SER di Kòrsou tabata e anfitrion. Pa e informe final tokante e tema aki, klek akí.

Awor ku kosta Marfil a asumí e presidensia di AICESIS e enfoke pa e próksimo dos aña ku ta bini lo ta pa redusí e espasio entre e kontinentenan riba tereno sosial-ekonómiko komo konsekuensia di desaroyonan mundial manera globalisashon akselerá, desaroyonan teknológiko, kambio di klima i faktornan demográfiko.

Den su diskurso inougural e presidente nobo Charles Koffi Diby di Kosta Marfil a señalá e nesesidat pa yega na akshonnan i esfuersonan konkreto riba nivel mundial pa redusí e desigualdat digital grandi entre paisnan pober i riku. Lo tuma den konsiderashon e metanan di desaroyonan duradero (SDGs) di Nashonnan Uní (VN) i e Centenary declaration di ILO ku ta enfoká riba e hende riba trabou di futuro.

El a sigui splika ku parti di su strategia nobo pa AICESIS bou di su presidensia lo ta pa fortifiká relashonnan eksistente ku órganonan di Nashonnan Uní relevante manera ILO i ECOSOC i pa sera relashonnan stratégiko ku otro organisashonnan multilateral relevante, manera e organisashon, Organisatie voor Economische Samenwerking en Ontwikkeling (OESO) i e programa ambiental, Milieuprogramma (UNEP). Tambe el a enkurashá e partisipantenan pa mas tantu posibel e region traha huntu riba temanan di interes komun i pa organisá reunionnan regional temátiko.

Finalmente, Diby a hasi un apelashon pa sigui fomentá diálogo sosial, inklusividat i partisipashon demokrátiko i uza e konosementu i eksperensha di AICESIS den e relashon ei riba un manera efektivo,  ya ku AICESIS ta un plataforma ku outoridat di diálogo i konosementu den mundo, kaminda plataforma di diálogo tripartit institushonalisá di doñonan di trabou, empleadonan, i gobièrnunan por siña i haña sabiduria . Pa e desishonnan di e reunion di direktiva i reunion general klek akí.

Despues di e Reunion General a tuma lugá un Konferensia Internashonal ku e tema: The governance of the digital economy: the critical role of social dialogue through ESC-Sis”. Tabata un konferensia hunto ku e Organisashon Internashonal di Labor  (ILO), ku AICESIS i e Konseho Sosial-Ekonómiko di Rumania. E evento akí a tuma lugá dia 10-11 di òktober di 2019. Pa e programa, e dokumentu di fondo i e presentashonnan di mas importante di ILO klek akí.

Share