Esfuersonan di SER Curaçao pa reaktivá e ret regional di e kolegio di konseho sosial-ekonómiko a duna fruta

Willemstad, 12 di sèptèmber 2019- Ku aprobashon di e ‘deklarashon di Antigua, Guatemala’ i ku lansamentu di e wèpsait regional di e konsehonan sosial-ekonómiko (Consejos Económicos y Sociales de América Latina y el Caribe)  (www.cesalc.org)  ku a tuma lugá durante un reunion regional ofisial den e siudat Antigua na Guatemala riba 4 i 5 di sèptèmber último, a alkansá un logro importante den konkretisashon di akuerdonan realisá anteriormente relashoná ku reaktivashon di e ret di CELSALC ku pa hopi aña tabata drumi. Danki na e esfuersonan di parti di e Konseho Sosial-Ekonómiko (SER) di Kòrsou ku a supla un bida nobo den e ret.

E enkuentro regional CESALC di siman pasá tabata un kontinuashon di un reunion tékniko bilateral ku a tuma lugá riba 5 di aprel di e aña akí entre e representantenan di SER di Guatemala (‘Consejo Económico y Social (CES) de Guatemala’) i e SER di Kòrsou. E konseho CES di Guatemala ta e kordinadó ofisial di e ret di CESALC miéntras e SER ta miembro di direktiva di asosiashon internashonal di e SER’nan (AICESIS) pa e region Amérika Latino i Karibe.

Aparte di e SER tambe tabata presente na e enkuentro regional e delegashonnan di e kolegio di konseho sosial-ekonómiko di Honduras, Guatemala, Repúblika Dominikano i Spaña. Entre e temanan di mas importante ku a diskutí tabata e struktura di gobièrnu i e forma di traha nobo di CESALC , e trabou di futuro i e oportunidatnan di trabou desente i e sinkronisashon di e maneho nashonal/regional riba realisashon di metanan di desaroyo duradero (DSGs) di Nashonnan Uní.

Durante e reunion tambe a palabrá pa apuntá un kordinadó nobo di CESALC pa e periodo 2019-2021. E kordinadó nobo ku ainda mester wòrdu apuntá lo desaroyá un plan di trabou den e próksimo dos luna i entregá esaki na e SER’nan ku ta afiliá na e ret regional. Den e ‘Deklarashon di Antigua, Guatemala’ e paisnan a komprometé pa konsolidá e ret i uzé komo un instrumento di diálogo, kompartí konosementu i interkambiá eksperensia den e region teniendo na kuenta ku e siguiente puntonan di salida:

• ku e SER’nan di region ta desaroyando den un plataforma stratégiko di diálogo, partisipashon i deliberashonnan entre aktornan ekonómiko relevante ku e meta pa un aporte efektivo na un desaroyo i implementashon di e maneho sosial-ekonómiko;
• ku e SER’nan den region mester hasi esfuerso pa inisiá e proseso di diálogo riba nivel nashonal i tambe dediká atenshon na e agènda regional i internashonal;
• Pa asina fomentá e koperashon regional;
• ku e ret di CESALC mester enfoká riba temanan ku ta importante pa e region manera e kombatimentu di hamber i pobresa den Amérika Latino i Karibe, stimulashon di kresementu ekonómiko, progreso, inklushon sosial, desaroyo duradero i e programanan i proyektonan dirigí riba protekshon di derechinan ekonómiko di esnan ku ta traha i esnan ku no ta traha, en partikular e gruponan mas vulnerabel manera hende muhé, muchanan, hende grandi, migrantenan, hende handikèp i pueblonan indígeno;
• ku e ret di CESALC ta presentá su rekomendashonnan na gobièrnunan den region pa asina hasi un kontribushon na e debate polítiko i gobièrnu tokante tópikonan sosial-ekonómiko relevante

Pa mas informashon por buska riba e wèpsait di CESALC (www.cesalc.org).
Klek akí pa e presentashonnan den Power Point i demas dokumentonan

For English click here