KÒRSOU TA PROFUNDISÁ RIBA FUTURO DI TRABOU

Hopi punto di bista na e minikonferensia tokante Futuro di Trabou

Willemstad, 12 di mei 2019 – Durante e minikonferensia riba Future of Work ku a tuma lugá den World Trade Center (WTC) djasabra 11 di mei i kaminda mas ku shen persona a partisipá, prinsipalmente profeshonalnan for di vários sektor di  komunidat, a diskutí ampliamente riba menasa i oportunidat den un merkado laboral instabil di Kòrsou. E Konseho Sosial Ekonómiko i Ministerio di Desaroyo Sosial, Labor i Bienestar (SOAW) a organisá e minikonferensia en preparashon di e fiesta sentenario otro luna di e Organisashon Laboral Internashonal, ILO. E radio emisora CuromZ86 a transmití e minikonferensia direktamente.  E planta di televishon Nos Pais Television tambe tabata presente i a filma e konferensia kompletu. Despues Nos Pais Television lo transmití e konferensia kompletu.

E presidente di dia Raúl Henriquez (direktor i sekretario general di SER) a  introdusí e minikonferensia i a mustra un mensahe di vidio di Minister Hensley Koeiman di SOAW. Den su spich Koeiman a animá e partisipantenan pa apesar di e retonan imenso ku Kòrsou ta konfrontando na e momentonan akí, pa mantené e tópiko intresante i pa enfoká riba e oportunidatnan ku tei. Komo ehèmpel konkreto el a menshoná entre otro e binida di Damen Shiprepair Curaçao, ku lo brinda kupo di trabou pa yu di Kòrsou i e binida di e empresa Corendon, ku ta konstruyendo un mega hotel riba nos isla i lo perkurá pa sufisiente kupo di trabou hustamente awor ku e sektor turístiko ta kresiendo. Mirando e  tema di e konferensia el a para ketu tambe riba promoshon di e metanan stratégiko manera, mas djòp, mihó protekshon sosial i respèt pa normanan fundamental di labor (‘decent work’).

Despues di e remarkenan introduktorio di Minister Koeiman, e direktor di SER, sr. Henriquez a papia riba e manera ku Kòrsou ta atendé e trayekto “Future of Work” i e ta splika e papel ku SER tin den esei, kaminda e ta pone un konekshon direkto ku e importansia di diálogo sosial i e ‘drivers of change’ den e mundo kompleho di trabou.Ya nos ta sinti desaroyo teknológiko, movementu demográfiko, kambio di klima i un globalisashon rápido riba nos isla, asina Henriquez a enfatisá. Den hopi sektor ekonómiko funshonnan ta disparsé komo konsekuensha di outomatisashon, digitalisashon i robòtisashon. Nos sistema di seguro sosial ta bou di preshon pisá dor di oumentu di hende ku ta bira grandi i hende nobo den nos komunidat. Dia 9 i 10 di mei 2019 e SER-nan di Aruba, Kòrsou i Sint Maarten a organisá un simposio hopi bon bishitá riba e problemátika di migrashon, ku ta pidi pa un maneho firme i un intervenshon efektivo pa kontrarestá e diferenshanan riba merkado laboral i pa garantisá eksistensia di nos sistema di seguro sosial. Tambe Henriquez a elaborá  riba subida di e nivel di laman ku na sierto partinan di e isla ya ta notabel i ku ta eksigí e atenshon nesesario.

“Mester stimulá diálogo sosial, ku partisipashon mas tantu posibel di komunidat tokante e movementunan i desaroyonan akí. Diálogo sosial i tripartitismo durante añanan ku a pasa a hasi un kontribushon notabel na realisashon di hustisia sosial i pas riba nivel mundial. E pensamentu ta ku mas ku nunka mester ofresé un solushon adekuá pa e retonan ku  transformashon ta trese den e “world of work”, segun Henriquez.

Despues Miguel Goede, outor i sientífiko, a presentá su konklushon i resultado di e investigashon ku el a hasi riba enkargo di SER i e ministerio di SOAW. E investigashon tabata di indóle kuantitativo i kualitativo riba moveshonnan na Kòrsou ku ta relashoná ku e tema Future of Work en general i partikularmente tambe riba e di Kuater Revolushon Industrial. E investigashon di Goede a enfoká riba e pregunta kiko ta tur e kosnan ku ta pasando riba e tereno akí den e vários sektornan, manera entre otro, gobièrno, e bida empresarial, ngo’nan, enseñansa, sindikalismo i e mundo akadémiko i kon ta hiba e diálogo den e sírkulonan akí. Pa e teksto di e rapòrt di e investigashon klek akí

E konklushon di mas importante for di e investigashon ta ku den tur e gremia aki tin debidamente atenshon kompleto pa e tópiko i ta hibando tambe diskushonnan i debatenan ku kontenido i sentido. Sinembargo, e diálogo na e momento akí ta muchu fragmentá i ta limitá na sierto aspektonan di Future of work. Ta falta un aserkamentu mas strukturá, integrá, holístiko riba tur aspekto, spesífiko na e tópiko akí. Partikularmente gobièrno, dunadó di trabou i empleadonan mester tin un papel mas prominente i duna un bon direkshon den esakí, sino den plataformanan eksistente manera e plataforma di diálogo nashonal, ‘Diálogo Nashonal Kòrsou ta Avansá’.

Despues di e konklushonnan i resultadonan di Miguel Goede a sigui un presentashon di Suzanne Larmonie, direktor di maneho di e Ministerio di Enseñansa, Siensia, Kultura i Deporte (OWCS), ku e título ‘Future of Education i digitalisashon den enseñansa’. Larmonie a splika detayadamente kon mester integrá e 21st Century Education Skills (esta, critical thinking, creativity, collaboration, media literacy, technology literacy en flexibility) den e sistema edukashonal i e tantísimo retonan ku enseñansa ta konfrontando pa inkorporá e abilidatnan di siglo 21 akí den e kuríkula di enseñansa.

Seguidamente tabata turno pa e lider di sindikato Wendell Muellens di e sindikato UGTK/CADMU pa trese dilanti e perspektiva sindikal riba e tema akí. ”Ounke e sektor sindikal ta bon konsiente di e kambionan riba merkado laboral, e ta di opinion ku no por bari e derechinan di labor atkerí den kuadro di e diskushon tokante ‘decent work’ for di mesa sin mas”, segun Muellens, kende a sigui enfatisá ku den sírkulo di movimentu sindikal internashonal tin diskushonnan profundo ta tumando lugá tokante esakí.

Clark Russel, empresario i presidente di e asosiashon di empresarionan na Kòrsou (VBC) i Denneth van der Veen, intrapreneur, laborando na Curaçaose softwarebedrijf Ictual N.V., na nan turno a duna nan punto di bista komo dunadó di trabou tokante Future of Work kaminda nan a para ketu riba e importansia di independensia i outosufisiensia di e trahadónan. Ambos a trese dilanti ku Kòrsou ta komo si fuera un paraiso pa biba i traha i ku Kòrsou mester habri su fronteranan pa trahadónan hóben ku konosementu i edukashon akadémiko avansá ku por traha i brinda nan produktonan i servisionan for di nos isla via di internèt na mundo kompleto. ,,Den e diskushonnan tokante maneho di migrashon e aspekto akí mester haña prioridat sigur”, segun nan opinion.

Finalmente, Runy Calmera, ekonomista i Veronika de Sampayo Garrido, eksperto di HR a duna nan punto di bista riba Future of work basá riba nan ekspertisio spesífiko, kaminda tur dos ta indiká ku e proseso ta ireversibel i ku ta eksigí kurashi di tur hende pa hasi e eskoho stratégiko korekto na tempu.

E konferensia a terminá ku un apelashon na komunidat pa fomentá diálogo sosial, pa protegé i poné den práktika pa kontrarestá polítika i debate públiko negativo i pa stimulá tripartitismo komo un balor agregá na e mundu di trabou.

Klek akí pa e presentashonnan di PowerPoint.