SER KOMO OPSERVADÓ NA E DI 11 KONFERENSIA DI ILO DI MINISTERNAN KARIBENSE

Kombersashonnan pa yega na kompromiso: Rapòrt ‘Traha pa un futuro mas briante’.

WILLEMSTAD, 13 di mei 2019 – Riba 14 i 15 di mei 2019 e Organisashon Internashonal di Labor, ILO a organisá e di 11 konferensia di ministernan di Karibe na Barbado títula ‘Dunando forma na futuro di trabou mas briante pa Karibe’’. E konferensia, ku kada dos aña ta selebrá i ta wòrdu fasilitá dor di e tim di e ofisina di Karibe di ILO, Decent Work Team and Office for the Caribbean, ku na promé instante ta destiná pa e ministernan di labor di den region di Karibe pa entre otro interkambia ku otro di idea riba temanan importante di aktualidat ku ta riba e agènda di ILO i pa huntu yega na un punto di bista Karibense kompartí riba e temanan akí.

E konferensia di ministernan di Karibe e aña akí a ser dediká na e selebrashon di shen aña di eksistensia di ILO (‘Centenary’) i a brinda e ministernan di labor, funshonarionan haltu i opservadónan di den region e oportunidat pa huntu diskutí riba e rapòrt ku e Komishon Internashonal di Futuro di Trabou di ILO títula ‘Traha pa un futuro mas briante’, publiká riba 22 di yanüari di e aña akí.

Den e rapòrt ‘Traha pa un Futuro mas Briante’ ta pidi gobièrnunan pa tuma un kantidat di medidanan pa enfrentá e retonan relashoná ku e kambionan impaktante den mundo di trabou. E rapòrt ta ekspresá e vishon pa un agènda enfoká riba e hende basá riba invershonnan den e kapasidatnan di hende, institutonan di trabou i trabou digno i duradero.

Un delegashon tékniko di e Konseho Sosial-Ekonómiko (SER) tabata presente komo opservadó na e konferensia. Manera ta konosí, SER tin un papel importante den e asosiashon internashonal di kolegio sosial-ekonómiko i institutonan similar (AICESIS) i ta hopi inbolukrá ku e tema futuro di trabou. Tambe riba nivel nashonal komo den region (denter di e nètwèrk Consejos Económicos y Sociales de América Latina y del Caribe, CESALC)  SER ta fasilitá inisiativanan den e konteksto akí. Pa mas informashon riba e konferensia bo por hañé riba e siguiente wèpsait:
https://www.ilo.org/caribbean/events-and-meetings/WCMS_681688/lang–en/index.htm

Pa mira e album di potrètnan di e evento klek riba e siguiente página di Facebook:
https://www.facebook.com/pg/ilo.caribbean/photos/?tab=album&album_id=1976826825778714

Pa e konklushonnan di e konferensia klek akí

Pa e presentashonnan di PowerPoint klek akí