Persbericht

Nederlands

English

‘Migrashon laboral i problemátika di refugiadonan ta eksigí maneho di poblashon duradero basá riba un aserkamentu konhunto’

Promé Minister Rhuggenaath ta sostené idea di SER-nan di paisnan Karibense den Reino

Willemstad, 15 di òktober 2018 – Pa por yega na un maneho duradero i responsabel riba area di migrashon (laboral / ekonómiko) i e problemátika di refugiadonan, ta rekomendabel pa e paisnan di Reino den Karibe, Aruba, Kòrsou i Sint Maarten traha huntu. Esaki basá riba kada unu su responsablidat i kompetensha legal. Den bon kooperashon ku otro nan por eksplorá senarionan, posibilidatnan i eskohonan ku a mediano i a largo plaso por ta benefisioso pa nan desaroyo sosial-ekonómiko.

Komo ku tur e tres paisnan ta konfrontando retonan similar riba e areanan menshoná, manera entre otro un kantidat relativamente grandi di migrantenan, migrantenan indokumentá, un preshon kresiente riba fondonan sosial i e potenshal pa tenshonnan sosial, ta un opshon si Aruba, Kòrsou i Sint Maarten por yega na palabrashonnan ku otro kon i di ki forma nan por asistí otro den formulashon di un maneho stratégiko, sientífikamente bon fundá, pa atendé ku e retonan aki, basá riba ‘lessons learned’ i ‘best practices’ den nan propio teritorio, den Reino i den region. E maneho mester ta unu ku lo no ta enfoká solamente riba e retonan menshoná sino tambe riba e posibilidatnan i benefisionan ku migrashon, spesialmente migrashon laboral, por tin pa ku desaroyo sosial-ekonómiko duradero di e paisnan. Ademas lo por eksplorá e impakto di desaroyonan regional i internashonal di migrashon riba varios tereneno manera (futuro di) trabou, siguridat sosial, kuido (mèdiko), embehisimentu i bida den barionan; i kon pa yega na maneho ku ta korespondé ku e impaktonan aki.

Esaki ta loke Promé Minister di Kòrsou sr. Eugène Rhuggenaath a haña komo rekomendashon dor di representantenan di e Konsehonan Sosial-Ekonómiko (SER-nan) di Aruba, Kòrsou i Sint Maarten djabièrne, dia 12 di òktober último, durante un enkuentro ku e tabata tin ku nan, ku a tuma lugá den sala di reunion di SER Kòrsou na Ansinghstraat.

Durante e enkuentro aki e presidentenan i sekretarionan general di SER-nan di Aruba, Kòrsou i Sint Maarten, akompañá pa nan konseheronan, a duna sr. Rhuggenaath un presentashon kon nan ta pará pa ku e tema di migrashon (laboral) den konteksto di desaroyo sosial-ekonómiko. Nan a enfoká riba e puntonan di salida ku nan ta kompartí i nan a plantia na e mandatario prinsipal di Kòrsou e idea pa tene un simposio riba e tema aki ku ekspertonan regional i internashonal.

Sr. Rhuggenaath na su turno a duna di konosé di ta sostené e idea di un aserkamentu konhunto dor di e tres paisnan i a trese pa dilanti ku e lo deliberá esaki ku su koleganan di Aruba i Sint Maarten mas lat e luna aki durante un siguiente enkuentro tripartit di e Promé Ministernan. Pa e vershon di e komunikado aki na Ulandes primi aki.

Riba e promé foto: di robes pa drechi: sr. Gerard Richardson (Direktor / Sekretario general di SER Sint Maarten), sr. John Jacobs (Presidente den funshon di SER Kòrsou), sr. Raul Henriquez (Direktor / Sekretario general di SER Kòrsou), Promé Minister sr. Eugène Rhuggenaath, sr. Felix Bijlhout (Sekretario general di SER Aruba) i sr. Damien Richardson (Presidente di SER Sint Maarten).

Riba e di dos foto: e delegashonnan di SER-nan di Aruba, Kòrsou i Sint Maarten den deliberashon ku Promé Minister Rhuggenaath i su tim riba e tema di migrashon i e problemátika di refugiadonan den konteksto di un maneho di poblashon duradero.

Share