Gobièrnu ke kambia impuesto riba turismo: SER a entregá konseho tokante “entry tax”

WILLEMSTAD — Konseho Sosial-Ekonómiko (SER) a entregá su konseho na minister di Finansa djárason 28 di òktober último tokante e plan pa introdusí un “entry tax”. E proposishon di gobièrnu ta kontené un impuesto nobo pa bishitantenan ku no ta biba na Kòrsou. 

Ku e medida, gobièrnu ke hasi e sistema di impuesto pa estadia korto mas simpel i e kobramentu mas efisiente. E proposishon ta kombiná un impuesto pa kada bishitante ku un eksonerashon di e impuesto di OB di 7 porshento ku ta apliká aktualmente riba estadia korto den e akomodashonnan ku e medida ta kubri. 

E tarifa general proponé ta 75 dòler merikano pa bishitante pa estadia. E pago lo mester tuma lugá na kuminsamentu di e estadia. E plan ta kontené tarifanan mas abou pa, entre otro, muchanan bou di 16 aña, residentenan di e otro islanan karibense di Reino Hulandes i bishitantenan ku a nase na Kòrsou. Pa studiantenan ku ta kumpli ku e kondishonnan, e konsepto ta proponé un tarifa di sero. 

Segun e splikashon di e konsepto di lei, e entradanan ta destiná na promé lugá pa finansiá e organisashon di turismo Curaçao Tourism Development Foundation (CTDF). E entradanan adishonal lo sirbi despues pa un oumento mas di e penshunnan di Seguro General di Behes (AOV). Si despues di esaki ainda tin fondo disponibel, gobièrnu ke finansia implementashon di e investigashon tokante kuantu turismo Kòrsou por sostené. 

SER a risibí e petishon urgente pa konseho riba 4 di sèptèmber 2026. E Konseho a studia e konsepto di lei, e splikashon korespondiente i datonan di e sektor turístiko. El a analisá e posibel efektonan ekonómiko i sosial, e aspektonan finansiero, e forma hurídiko i e posibilidat pa ehekutá e medida. Tambe el a tuma na konsiderashon desaroyonan internashonal rondó di impuesto riba turismo i e eksperensia di Boneiru ku entry tax. 

Ademas, SER a tene konsulta ku e ministerionan di Finansa i Desaroyo Ekonómiko, e sektor Asuntunan Fiskal, CTDF i e organisashonnan  sektoral CHATA i CASHA, ku ta representá, entre otro, hotèlnan, apartamentunan i akomodashonnan chikí. 

E Konseho, ku tin representantenan di dunadónan di trabou i trahadónan huntu ku miembronan independiente, a aprobá e dokumento durante un reunion plenario ekstraordinario riba 23 di òktober 2026.