SER: kresementu mester mehorá bida di hende
WILLEMSTAD, 12 di òktober 2026 — Kresementu ekonómiko na Kòrsou mester trese mas seguridat ekonómiko, trabou desente i servisio públiko aksesibel. Esaki ta e mensahe sentral den e prólogo di e relato anual 2025 di Konseho Sosial-Ekonómiko (SER). Segun SER, mester midi progreso pa loke habitantenan ta eksperensiá den nan bida diario.
Promé minister Gilmar Pisas a risibí e relato anual na nòmber di gobièrnu djabièrnè 9 di òktober, for di man di drs. Raul Henriquez, direktor/sekretario general di SER. Henriquez a entregá e relato na nòmber di e konseho i su presidente den funshon, mr. John Jacobs. E entrega a tuma lugá den e márgen di e Caribbean United in Excellence Summit, un enkuentro riba koperashon regional den kuadro di Dia di Outonomia.
“Kresementu no mester ta un meta riba su mes, sino un medio; prosperidat amplio mester ta e ophetivo”, Henriquez ta skirbi den e prólogo.
E relato ta rekonosé e dinamismo ekonómiko di 2025. Ofisina di Turismo (CTB) a registrá e aña ei un rèkòrt di 788.427 yegada di turista di estadia. E prólogo ta pone e pregunta kon kresementu ekonómiko ta reflehá den e kapasidat atkisitivo di hogarnan, e kalidat di trabou i e posibilidat di paga gastunan di bibienda. Segun e prólogo, akseso na bon edukashon i bon kuido di salú tambe ta determiná e benefisio ku kresementu ta trese pa komunidat.
P’esei, e prólogo ta boga pa un enfoke integral: stimulá mas empresa i invershon, oumentá produktividat i prepará hende pa kambionan riba merkado laboral. Alabes, mester fortalesé servisio públiko i mantené un sistema di seguridat sosial sostenibel. Finansa públiko sano i un maneho di gobièrnu previsibel ta kondishonnan importante pa esaki.
Diálogo sosial tin un papel sentral den e enfoke aki. Den SER, representantenan di dunadónan di trabou i trahadónan ta diskutí ku miembronan independiente tokante e konsekuensianan di proposishonnan di maneho i e posibilidat di ehekutá nan. Dor di evaluá e echonan i trese diferente interes huntu, e konseho ke kontribuí na desishonnan mihó fundamentá. P’esei, e relato ta enfatisá ku mester envolví SER na tempu, pa por identifiká opstákulonan i fortalesé e kontenido di e proposishonnan.
Na 2025, SER a emití 12 konseho, entre otro riba reforma fiskal, kompensashon pa stazjèrnan, salario mínimo i diagnóstiko di laboratorio. Ku e relato anual, e konseho ta rindi kuenta na públiko di su trabou di asesoramentu, diálogo i koperashon.
E relato anual kompleto ta disponibel riba wèpsait di SER (www.ser.cw).
