Reunion introduktorio entre SER i FTAC

Willemstad, 20 di febrüari 2022 – Saliendo for di e nesesidat mutuo di sigui amplia kontaktonan i establesé formanan di kooperashon nobo riba nivel institushonal ku órganonan di supervishon i di asesoria, a tuma lugá, djabièrnè dia 18 de febrüari 2022, un promé reunion introduktorio entre Konseho Sosial Ekonómiko (SER) di Kòrsou i e Outoridat di Komersio Hustu (Fair Trade Authority Curaçao, FTAC). Durante e enkuentro aki a interkambiá di idea riba e posibel ròl ku SER lo por desempeñá komo órgano permanente di asesoria riba asuntunan sosioekonómiko den e aplikashon di e funshon di supervishon ku FTAC tin. E investigashonnan ku FTAC ta kondusí  detektá  posibel violashon di prohibishon di kartel i riba posibel abusu di poder ekonómiko di empresanan, tin un dimenshon sosioekonómiko ku no por ignorá. E poder di investigá tipo di violashonnan aki dor di FTAC tin su base den e Ordenansa riba Kompetensia. E ordenansa aki, resientemente a ser evaluá. Parsialmente komo resultado di e evaluashon aki, direktiva di FTAC a drenta den kontakto ku SER pa un promé interkambio. Partidonan a konkordá ku otro ku den e próksimo periodo nan lo sigui eksplorá, riba nivel tékniko, kon lo por duna kontenido práktiko i efektivo na e relashon di trabou. Tambe a hasi uso di e okashon pa entregá na SER e informe anual di FTAC pa aña 2020.

Riba potrèt:

Presidente di FTAC sra. Miroslava Wedervoort ta entregá un  ehemplar di e informe anual di FTAC di 2020 na presidente den funshon di SER sr. John Jacobs, den presensia di direktora di FTAC Varressa Elisabeth i e direktor/sekretario general di SER sr. Raúl Henríquez.