Komunikado
Resultado deliberashon tékniko bilateral entre e SER-nan di Kòrsou i Guatemala
Un plan pa fortifiká kolaborashon entre e kuerpo di konseho sosial-ekonómiko di region
Guatemala City/Willemstad, 9 di april 2019- Saliendo for e nesesidat pa kompartí konosementu intensivo, interkambiá eksperensia i pa fortifiká kolaborashon institushonal entre e konsehonan sosial-ekonómiko di e region, mester di un koordinashon sólido i tambe un aserkamentu struktural i dirigí riba resultado basá riba metanan bon kla formulá. Ta p’esei pa e periodo binidero mester desaroyá un plan komo base pa duna kontenido mas efektivo na e manera kon e ret regional di e SER nan i CESALC (Consejos Económicos y Sociales de America Latina) ta operando aktualmente.
Esei ta un di e resultadonan di mas importante di e deliberashon tékniko bilateral ku a tuma lugá djabièrnè 5 di aprel 2019 entre representantenan di e SER di Guatemala (‘Consejo Económico y Social (CES) de Guatemala’) i esun di Kòrsou.
E CES di Guatemala ta koordinadó di e ret di CESALC i e SER di Kòrsou ta miembro di e direktiva i sekretario-general suplente pa e region Latinoamérika i Karibe di e asosiashon mundial di e konsehonan sosial-ekonómiko i institutonan similar, AICESIS.
Na e deliberashon tékniko ku a tuma lugá den e ofisina di CES na Guatemala City, a partisipá den representashon di SER Kòrsou: sr.drs. Raúl Henriquez (direktor/sekretario general) i sra. mr. Miloushka Sboui-Racamy (konsehero prinsipal di e órgano di konseho). E CES di Guatemala tabata representá pa sr. Arnoldo Aval (konsehero sektor koperativa), sr. Jairo Castañeda (konsehero tékniko di sekretariado), sr. Bernardo López (sekretario tékniko) i sra. Romelia de Jesús Silva Marroquín (konsehero relashon interinstitutional).
Durante e deliberashon a elaborá ekstensivamente riba e benefisio i e nesesidat pa tin un direkshon i koordinashon mas rígido di e ret di CESALC pa asina por logra bentahanan mutuo di e koperashon regional. Dor di sigui traha riba e initiativanan ku a ehersé kaba den e konstelashon di CESALC, dor di desaroyá un agènda regional komun (ku un planifikashon di tempo rígido) i pa fortifiká e relashon ku AICESIS mas i pa asina e organisashon di labor internashonal ILO por ofresé un perspektiva nobo na konseptonan manera diálogo sosial, tripartitismo i un sosiedat inklusivo, kaminda ta wòrdu rekonosé ku nan por kontribuí sustansialmente na un desaroyo sosialekonómiko duradero den e region.
Pa kontinuá ku esei e delegashon tékniko di e SER’nan di Kòrsou i Guatemala a akordá pa e segundo mitar di aña akí pa organisá algun reunion temátiko di e ret di CESALC ku atenshon speshal riba metanan di desaroyo duradero (SDG) di Nashonnan Uní (NU), e rekomendashonnan di ILO Global Commission on the Future of Work i e kaso di SER di Brasil ku den konstelashon di CESALC tabata konsiderabelmente aktivo, pero ku despues di e último elekshon presidensial den e pais ei, a wòrdu anulá. E delegashon tékniko di SER Kòrsou a ekspresá su disponibilidat pa posibelmente ta e anfitrion di e reunionnan temátiko. Elementonan útil for di e reunionnan akí lo wòrdu prosesá den initiativa di konsehonnan.
Seguridat di alimento
Promé ku e delibershon tékniko bilateral, e miembronan di e delegashon di Kòrsou por a sinta komo observadó den e seshon plenario di e CES di Guatemala. E tema sentral di e reunion tabata “garantisá seguridat di alimento na Guatemala i e efektividat di maneho di gobièrnu den easki’. Apesar ku e pais ta riko na agrikultura i krio di bestia, ta eksistí un pobresa grandi (6 di 10 persona ta biba bou di e límite di pobresa). Pa motibu di defisiensianan institushonal i un maneho presupuestario sumamente defisiente, ta un desavio pa atendé e problemátika di hamber riba un manera duradero na Guatemala. Práktikamente tur gremio di e komunidat ta rekonosé esei i nan ta purba di establesé fundeshinan atraves di partisipashon pa asina por kumpli ku e metanan di desaroyo number 1 di Nashonnan Uní. (lucha kontra pobresa) i number 2 (lucha kontra hamber). E CES di Guatemala relashoná ku esei tin un ròl konsultativo i ta trata pa atraves di reunionnan ku multi-stakeholder pa pone e problemátika serio akí riba mesa pa un posibel diskushon.
Riba e promé potrèt di man robes bai drechi:
E presidente den funshon di e SER di Guatemala sr. Carlos Amador, e direktor/sekretario general di SER di Kòrsou sr. Raúl Henriquez, e konsehero mayó di e órgano di konseho sra. Miloushka Sboui-Racamy, e Visepresidente di e sektor kooperativo sr. Rodolfo Orozco i e sekretario tékniko di e SER di Guatemala sr. Bernardo López.
