Komunikado
Ret Regional di SER-nan (CESALC) rebibá
WILLEMSTAD, 30 di òktober 2018 – Fortifikashon di koherensia sosial (inclusive society) i e ról ku e órganonan konsultativo sosial-ekonómiko (SER-nan) di region Latinoamérika i di Karibe por tin den duna mas kontenido i forma na esaki, ta e tema sentral di e reunion regional di CESALC, e ret regional di e SER-nan, ku pa un tempu relativamente largu tabata inaktivo, i ku ser ta reaktivá atrobe. E reunion lo tuma lugá na kuminsamentu di desèmber 2018 den e siudat di Santa Cruz de la Sierra na Bolivia. Pa e reunion di CESALC e siguiente paisnan a risibí un invitashon: Repúblika Dominikano, Brasil, Guatemala, Honduras, Panama, Bolivia, Argentina, Kòrsou, Sint Maarten, Aruba, Chili, Paraguay, Uruguay, Colombia, Costa Rica, Ecuador i El Salvador. Di e paisnan akí Repúblika Dominkano, Brasil i Kòrsou ta miembro di e direktiva di AICESIS pa e periodo di 2017-2019, e asosiashon internashonal di SER-nan i Institutonan Similar. Pa e periodo akí Kòrsou ta fungi tambe komo Sekretario General suplente di AICESIS pa e region di Latinoamérika i Karibe. Den e mesun funshon SER di Kòrsou a lòbi e último lunanan den e gremio di AICESIS i tambe serka SER-nan individual, manera Spaña, Brasil i Argentina, pa e SER-nan di e region bolbe bini huntu den un plataforma institushonalisá CESALC. E último reunion di CESALC a tuma lugá na 2014 na Argentina. Pa motibu di falta di fondonan el a keda para ketu despues. E reaktivashon real di CESALC tabata posibel e aña akí dor ku e SER di Spaña (CES) den kolaborashon ku Koperashon di Desaroy Internashonal (ARECID) a pone fondonan disponibel mediante e proyekto INTERCOONECTA ku ta dirigí pa stimulá i kompartí konosementu, interkambio di eksperensia i koperashon institushonal mutuo entre Spaña un banda i otro banda, e paisnan ku ta papia spaño i portuges den e region Latinoamérika i Karibe. Ounke ku Kòrsou no ta formalmente parti di e grupo di paisnan ibero-amérika, tòg e ta parti di e ret regional.
Klek akí pa mas informashon.
