Komunikado

Partisipashon Kòrsou na tayer UNFPA Suriname

WILLEMSTAD,  1 di novèmber  2018 – Un delegashon ofisial di e Konseho Sosial Ekonómiko (SER), Direktiva di Asuntonan Eksterior (DBB) i e Centraal Bureau voor de Statistiek (CBS) ta partisipá di 31 di òktober te ku 2 di novèmber 2018 den un tayer organisá pa UNFPA (United Nations Population Fund) tokante desaroyo di Population Situation Analysis (PSA) den e region di Latinoamérika i Karibe.

E tayer di tres dia ta trata e metodologia ku por usa pa sostené e formulashon pa maneho di populashon.

E partisipantenan den e tayer ta e diferente ministerionan i institutonan di Surnam. Den kuadro di e kolaborashon entre organisashonnan di NU i Kòrsou, a invitá Kòrsou pa sera konosí ku e metodologia.

E Minister di Surnam di Asuntonan Interior, sr. Mike Noersalim a hasi e apertura di e tayer, siguí pa un introdukshon di e direktor di e ofisina di Planifikashon di Surnam, sr. Reynol Simons. Sr. Alphonse MacDonald, eksperto riba tereno di e problemátika di populashon i estadístika i ku den pasado tabata traha na UNFPA, a fasilitá e kontenido di e tayer.

E tayer ta interesante pa Kòrsou tambe, ku bista riba e simposio tokante Migrashon (di labor) i Maneho di populashon ku e SER-nan di Kòrsou, Aruba i Sint Maarten lo bai organisá huntu na Kòrsou den e promé kuartal di 2019. Ku e resien firmamentu di 26 di òktober último di e protokòl di kooperashon riba tereno di migrashon (di labor) i maneho di populashon, e promé ministernan di Aruba, Kòrsou i Sint Maarten a indiká ku nan ta aprobá e initiativa akí di e tres SER-nan.

E simposio ta enfoká prinsipalmente riba e pregunta kon por benefisiá mas efektivamente ku ta posibel di e posibilidatnan i benefisionan ku migrashon, prinsipalmente migrashon di labor, por tin, i kon por atendé ku esakinan riba un manera struktural. Akí lo utilisá lesson learned i best practices di den region i otro lugánan. E enfoko lo ta dirigí riba desaroyo duradero sosialekonómiko di e paisanan.

Riba e potrètnan:

E delegashon di Kòrsou durante e tayernan di man robes bai drechi sra. Barbara Perquin, konsehero prinsipal di SER, sra. Denise Vijber, kolaborador di maneho di DBB, i sr. Leander Kuijvenhoven, investigadó prinsipal di estadístika/demográfiko di CBS.

Sr. A.L. MacDonald, fasilitadó di e Tayer di PSA.

Barbara Perquin ku e minister di Surnam di Asuntonnan Interior i sra. Judith Brielle (UNFPA)

Denise Vijber ta presentá e resultadonan di e grupo di trabou di Kòrsou.

Share