PROMÉ MINISTER GILMAR PISAS A REUNÍ KU SEKRETARIO DI SER

Willemstad – Promé Minister Gilmar Pisas a reuní ku sekretario di SER (Konsulta Sosial Ekonómiko) sr. Raul Henriquez dia 16 di mei 2022.
Durante e reunion a elaborá riba diferente tema di interes ku ta regardá e órgano di estado aki.
Entre otro a trata e ofisialisashon di miembronan independiente di e órgano, kendenan for di aña 2010 no a haña e dekreto gubernamental (landsbesluit) korespondiente. Den estrecho konsulta ku SER pronto e dekretonan gubernamental lo yega Konseho di Ministernan pa e promé aprobashon i despues pa sigui pa ofisialisá e dekretonan aki.
Sr. Henriquez a presentá tambe un konseho den kual SER ta proponé un maneho pa órganonan di Gobièrnu usa na momentu ku nan ta tratando un konsepto di lei òf regulashon. E maneho proponé aki ta duna den liña kla na kua momentu un konsepto di lei òf regulashon lo mester bai SER pa konsulta.
Por último sr. Henriquez a notifiká na Promé Minister sr. Pisas ku un delegashon di SER lo ta presente na e konferensia internashonal ku e tema “Climate Crisis and Social Dialogue towards Sustainable Transition” dia 27 yüni binidero.