Persbericht

Emití pa sekretariado di Konseho Sosial Ekonómiko (SER)

 

Delegashon SER Kòrsou ta tuma inisiativa pa reaktivá ret CESALC

Abidjan, Kosta di Marfil, 8 di mart 2018

Durante un ‘lunch meeting’ ku e delegashon tékniko di Konseho Sosial Ekonómiko (SER) di Kòrsou, ku awe ta asistiendo na e reunion anual di direktiva di e Asosiashon Internashonal di Konsehonan Sosial-Ekonómiko i Institushonnan Similar (AICESIS) na Abidjan, kapital di Kosta di Marfil, tabatin ku nan koleganan di Brasil, Repúblika Dominikana i Spaña, a bini pa dilanti e nesesidat agudo pa riba término korto inisiá un proseso pa reaktivá e ret CESALC (Consejos Económicos Sociales de América Latina y del Caribe).

E ret aki, na kua ta partisipá ‘SER’-nan nashonal di region, pa algun aña kaba no ta aktivo pa diferente motibu, di kua esnan mas importante ta falta di fondonan, instabilidat polítiko i ekonómiko den algun pais (p.e. Brasil, Guatemala i Honduras) i tambe falta di liderazgo.

Kòrsou, Brasil i Repúblika Dominikana, ku ta representando region komo miembronan di direktiva di AICESIS na e pais Afrikano, a deliberá riba inisiativa di Kòrsou riba futuro di CESALC i a haña otro riba e nesesidat pa reaktivá e ret aki i amplia CESALC ku konsehonan sosial ekonómiko den region ku ta operá riba nivel regional/munisipal manera e ‘SER-nan’ di Jalisco, Mexico i Buenos Aires, Argentina.

E delegashon di Spaña, ku tambe tabata presente na e meeting, a duna splikashon amplio riba e programa Interkonekta, ku den kuadro di e plataforma Ibero-Amerikana ta finansiá inisiativanan pa fomentá tripartitismo, diálogo sosial i lantamentu di plataformanan i/o mekanismonan konsultativo den paisnan di habla hispana den Latino Amérika i den Karibe.

Spaña a komprometé su mes pa den kuadro di e programa Interkonekta duna atenshon debido na e aspirashon pa reaktivá e ret CESALC.

SER Hulanda, ku tambe a djòin e grupo durante di e enkuentro , ta pará simpátiko pa ku e inisiativa aki.

Riba e foto e delegashonnan durante nan enkuentro. Di robes pa drechi: SER Kòrsou (Raul Henriquez i Miloushka Sboui-Racamy), SER Brasil (Gustavo Ramos), SER Repúblika Dominikana (Iraima Capriles), SER Spaña (Juan Moscoso del Prado Hernández i Luis Sauto) i SER Hulanda (Véronique Timmerhuis).

 

 

Share