Persbericht

‘Fortifiká lasonan basá riba un vishon kompartí’

Enkuentro entre direktornan/sekretarionan di Konsehonan Sosial Ekonómiko (SER-nan) di Kòrsou i Aruba

Willemstad, 15 di sèptèmber 2017 – Fortifiká lasonan entre Konsehonan Sosial Ekonómiko (SER) di Aruba, Kòrsou i Sint Maarten basá riba un vishon kompartí i formulá un strategia, konhuntamente ku SER di Hulanda, pa yega na un forma di interkambio mas struktural riba temanan di interes komun ku e fin pa duna mas realse na e konsepto di tripartitismo den e tres paisnan Karibense di Reino Ulandes, ku partisipashon real di partnernan sosial.

Esaki a forma e tema prinsipal di e enkuentro di kortesia ku a tuma lugá ayera mainta entre e direktornan/sekretarionan general di e Konsehonan Sosial Ekonómiko di Aruba i Kòrsou den sala di reunion di SER na Ansinghstraat. Durante e enkuentro aki e direktornan/sekretarionan general srs. drs. Raul Henriquez (SER Kòrsou) i drs. Felix Bijlhout (SER Aruba) a sera konosí ku otro formalmente i a interkambiá di idea ku otro riba temanan di aktualidat ku ta ser konsiderá komo importante pa paisnan di Reino den Karibe, manera entre otro ekonomia, empleo, kombatimentu di pobresa, desempleo bou di hóbennan, desaroyo sosial duradero i bon gobernashon. Debí na e situashon frágil na Sint Maarten komo konsekuensia di orkan Irma i e echo ku SER di Sint Maarten ta konfrontando desafionan institushonal, e kolega di Sint Maarten no por tabata presente na e enkuentro.

Un punto ku tambe a papia riba dje tabata e similaridatnan ku e dos órganonan estatal a topa den preparashon di nan konsehonan riba e tema di suèldu mínimo.

E dos funshonarionan di e órganonan di konseho di Kòrsou i Aruba a palabrá konkretamente ku otro ku konhuntamente nan lo traha riba un agènda pa un bishita di trabou ku a korto plaso lo tuma lugá na Hulanda, kaminda lo intensivá e kontaktonan ku SER di Hulanda i otro institutonan manera entre otro Ofisina Sentral di Planifikashon (Centraal Planbureau), Ofisina di Planifikashon Sosial Kultural (Sociaal en Cultureel Planbureau), Fundashon pa Labor (Stichting van de Arbeid), ministerio di Ekonomia i ministerio di Asuntunan Sosial.

Riba e pòrtrèt por mira e dos funshonarionan den deliberashon ku otro, kompañá pa un konsehero di SER Kòrsou.

Share