Plataforma di mentoring orientá pa futuro: Paso inovativo pa  Reino Hulandes

Willemstad, 18 di yanüari 2024 – Riba djamars, 16 di yanüari último, Steven de Lira, consultant eksperensiá, coach, i outor di “Tur hende ta un mentor”, a bishitá Konseho Sosial i Ekonómiko (SER) di Kòrsou. De Lira, nasé na Kòrsou, ta integrá insightnan di e kultura lokal di ‘nos’ ku práktikanan organisatorio moderno i tambe ta kreadó di e método di Social Deep Learning.

E enfoke di e bishita aki tabata riba e diskushon pa establesé un plataforma na nivel di reino Hulandes, dediká na desaroyo sosio-emoshonal di hóbennan entre 15 i 25 aña. E plataforma aki ta diseñá pa mehorá e selekshonnan di estudio i karera di hóbennan i pa fortifiká nan partisipashon síviko. Hasiendo uso di téknikanan inovativo di liderazgo i teknologia avansá di ICT, ta trahando riba e desaroyo di un plataforma di mentoring akseptabel.

Durante e bishita, a tene diskushonnan produktivo ku ekspertonan i konseheronan na SER tokante un posibel kolaborashon. E partidonan tin e intenshon di avansá pa eventualmente firma un ‘karta di intenshon’ pa un partnership den e proyekto inovativo aki.

SER, ku su kompromiso firme pa promové bienestar i durabilidat, ta konsiderá e plataforma di mentoring aki komo un hèrmènt balioso pa asistí hóbennan i organisashonnan den enfrentá e desafionan aktual. E proyekto ta aliniá bon i ta den harmonia ku e prinsipionan di Prosperidat Amplio (Brede Welvaart) i ta apoyá aktivamente e Metanan di Desaroyo Sostenibel (SDG’s) di Nashonnan Uni, ku un enfoke espesífiko riba SDG 3 (salú i bienestar), SDG 8 (trabou desente i kresementu ekonómiko) i SDG 17 (asosiashon pa logra metanan).

E inisiativa aki ta mira pa logra un avanse signifikante den desaroyo di e poblashon hóben i pa kontribuí na e prosperidat sosial i ekonómiko den hinter Reino Hulandes.