SER-nan di mundu ta revisá kolaborashon ku OIT

Willemstad, 2 di febrüari 2024 – Bou di direkshon di Konseho Ekonómiko i Sosial (SER) di Kòrsou, a tuma lugá e promé reunion ekstraordinario di Konseho di Atministrashon di e Asosiashon Internashonal di Konsehonan Ekonómiko i Sosial i Institushonnan Similar (AICESIS) pa aña 2024, riba djárason 31 di yanüari último. E seshon aki, kompletamente online, a reuní representantenan di paisnan manera Aruba, Benín, China, Kosta di Marfil, Fransia, Gresia, Guatemala, Luxemburg, Monaco, Repúblika Demokrátiko di Congo, Rumania, Rusia, Senegal, Servia i di Union di Konsehonan Ekonómiko i Sosial di Afrika (UCESA), i tabata enfoká riba evaluashon di kolaborashon ku Organisashon Internashonal di Trabou (OIT).

E kolaborashon aki, ofisialmente establesé riba 8 di mei 2012 i renobá riba 23 di òktober 2018 na Ginebra, Suisa, ta testiguá e kompromiso kompartí pa usa ekspertisio konhunto pa atendé ku e desafionan sosial i laboral urgente. E Akuerdo di Koperashon AICESIS-OIT, ku ta ser revisá kada seis aña, ta enfoká riba temanan klave manera diálogo sosial institushonalisá, tripartidismo i promoshon di demokrasia partisipativo, konforme e Agènda 2030 di Nashonnan Uní i e diskushonnan global riba futuro di trabou.

E reunion di Konseho di Atministrashon di AICESIS di e siman aki a finalisá ku aprobashon unánime di un informe krítiko, proponé pa Presidensia di Kòrsou, ku lo guia e siguiente evaluashon i desaroyo adishonal di e koperashon AICESIS-OIT. E informe ta resaltá e nesesidat kontinuo pa enfoká riba e agènda di trabou desente i fortifikashon institushonal di e miembronan.

E asignashon resien di SER Kòrsou komo presidente di AICESIS ta resaltá e ròl kresiente di Latinoamérika i Karibe riba esenario internashonal. E próksimo reunion statutario di Konseho di Atministrashon di AICESIS, ku lo tuma lugá na siudat di Guatemala na final di aprel di e aña aki, lo enfoká riba e tema di “kresementu amplio i inklusivo”, un punto prinsipal di e presidensia di Kòrsou.