Komunikado di prensa
SER ta presensiá presentashon riba proyekto inovador di supmarino di Proteus Ocean Group
“Un koperashon ku ta enfoká riba mitigá efektonan di kambio klimatológiko i desaroyo lokal”
Willemstad, 27 oktober 2023 – Un delegashon tékniko di Konseho Sosial Ekonómiko (SER) a presensia djaluna dia 23 di òktober 2023 un presentashon riba e proyekto inovador di investigashon bou di awa di Proteus Ocean Group. Sr. Fabien Cousteau, yu di e almirante i oseanógrafo mundialmente renombrá Sr. Jacques-Yves Cousteau, kofundador i na mes momento eksploradó oseániko prinsipal di Proteus Ocean Group, a tene e presentashon. El a keda asistí pa sra. Lisa Marrocchino, CEO i miembro di direktiva di Proteus Ocean Group. E evento a keda ko-organisá pa entre otro Kámara di Komèrsio di Kòrsou.
E presentashon, ku a tuma lugá durante un evento ku tabata bon bishitá, no tabata solamente inspirante sino tambe inovador i prometedor. Proteus Ocean Group a anunsiá un presensia regular na Kòrsou durante e siguiente fase di konstrukshon di nan habitát modular bou di awa. Sitionan na Cas Abou i Nieuwpoort ta wòrdu investigá na e momentunan aki pa nan sustenabilidat komo posibel lokalidat pa e habitát.
Proteus Ocean Group ta pone énfasis riba e importansia krusial di koperashon ku organisashonnan lokal i internashonal. Ademas, nan ta trata di usa personal lokal kada bes ku ta posibel. Ademas, nan tin intenshon pa hasi un kontribushon balioso na nos pais pa medio di kompartimentu di data, konosementu i derechinan di propiedat intelektual di inovashonnan lokal. Tambe nan ta wak un amplio rango di oportunidatnan edukativo, no solamente pa Kòrsou pero pa henter mundu, spesialmente den e área di mitigashon di efektonan di kambio klimatológiko.
Pa mas informashon tokante Proteus Ocean Group i su habitát avansá bou di awa, por fabor bishita e siguiente linknan:
