SER ta bishitá Raad voor Onderwijs en Arbeidsmarkt Caribisch Nederland

WILLEMSTAD, 29 di mei 2018 – Ku bista riba e intenshon pa reformá e konseho, Raad voor Onderwijs en Arbeidsmarkt (ROA) i pa reaktivá e Kenniscentrum Beroepsonderwijs Bedrijfsleven (KBB), Konseho Sosial Ekonómiko (SER) a hasi 25 di mei 2018 un bishita di trabou di un dia na e konseho, Raad voor Onderwijs en Arbeidsmarkt van Caribisch Nederland (ROA CN) na Boneiru.

Siman pasá a entregá SER pa konseho un proyekto di inisiativa di un ordenansa pa krea un ROA- den un forma renobá. E solisitantenan ku a entregá e petishon akí ta miembro di e frakshon di PAR den Parlamento. Den kuadro di dunamentu di konseho SER ta investigá e nesesidat i metanan di un ROA, i lo hiba kombersashonnan ku ekspertonan i partidonan konserní

Meta di e bishita na ROA CN na Boneiru tabata pa sera konosí ku otro i kompartí informashon riba e forma di traha i e logronan di ROA CN. E delegashon tabata konsití di e Sekretario general di SER, sr. R. Henriquez i e konsehero di maneho sra. B. Perquin.

ROA CN ta un fundashon independiente, kreá i finansiá dor di e ministerio ulandes di Enseñansa, Kultura i Siensia (OCW). ROA CN ta forma un brùg entre enseñansa vokashonal avansá (mbo) i e merkado laboral riba e tres islanan den Karibe Ulandes. ROA CN ta perkurá pa un bon konekshon entre e oferta di edukashon riba nivel di mbo i e demanda di dunadó di trabou.

E bishita a duna un gran kantidat di informashon i kontakto i a duna tambe un bista den e nesesidat i forma di traha di un ROA. Tambe a sali na kla ku un ROA na Kòrsou, pa motibu di e demanda mas grandi di enseñansa avansá vokashonal i pa motibu di reaktivashon di e KBB, mester bai enfoká  mas riba formulashon di maneho tokante konekshon di enseñansa i merkado laboral i tambe riba diferente nivel di enseñansa. Kaminda ta buska kooperashon ku un órgano di ehekushon (manera KBB) ku ta sòru pa un konekshon práktiko i koordinashon entre enseñansa i merkado laboral.

Antia Ulandes ya tabata konosé un Raad voor Onderwijs en Arbeidsmarkt durante añanan 2002 pa 2009. Esaki a wòrdu trese bou di responsabilidat di e Sekretariado di SER. E tempu ei ROA tabatin tantu un tarea práktiko komo un di maneho. Na Kòrsou den añanan 2008 pa 2015 e Kenniscentrum Beroepsonderwijs Bedrijfsleven, ku tabata dirigí riba mehorá konekshon di edukashon vokashonal tambe tabata operashonal, ku tabata sòru pa mehorá e konekshon entre enseñansa i merkado laboral.

Minister di Enseñansa, Siensia, Kultura i Deporte (OWCS) tin intenshon pa rebiba tantu ROA komo KBB, kaminda ku ROA lo bai enfoká riba asuntonan di maneho riba tereno di enseñansa i merkado laboral. Relashoná ku e petishon pa e konseho ya menshoná, SER ta bai duna konseho tokante un ROA reformá, e metanan, struktura di gobernansa, diseño di e organisashon i e relashon di trabou ku órganonan di ehekushon, manera KBB.

E ofisina di e sekretariado SER/ROA/GOA ta sufisientemente bon ekipá pa sostené i fasilitá e Raad voor de Onderwijs en Arbeidsmarkt (ROA) ku mester wòrdu kreá ainda.

Riba potrèt: e personal di ROA CN huntu ku e delegashon di e sekretariado di SER/ROA/GOA; deliberashon entre ROA CN i delegashon SER di Kòrsou.