Fundashon ‘Centrum
Arbeidsverhoudingen Overheidspersoneel’ (CAOP) di bishita serka sekretariado di SER i CGOA

Willemstad, 25 di mei 2018 – Den kuadro di e esfuersonan inkansabel di parti di e sekretariado di Konseho Sosial Ekonómiko (SER), ku a la bes ta sostené e plataforma di diálogo entre gobièrno i representantenan di empleadonan públiko CGOA (Centraal Georganiseerd Overleg in Ambtenarenzaken), pa sigui fortifiká lasonan eksistente di trabou ku gruponan i organisashonnan di interes, a invitá djabièrnè dia 25 di mei último dos representante di e fundashon Hulandes CAOP (Centrum Arbeidsverhoudingen Overheidspersoneel) pa un interkambio riba e tópiko di partisipashon real di empleadonan.

Durante e interkambio ku señor Marco Sikkel i Alphons de Lange di CAOP, ku ta di bishita na Kòrsou i e islanan BES e dianan akí, a elaborá riba e nesesidat pa duna mas kontenido na e aspekto di partisipashon, manera ta stipulá den artíkulo 22, insiso 2, di Areglo di Estado di Kòrsou.

Artíkulo 22, insiso 2, lei mester introdusí reglamentu ku ta protehá empleadonan i ku ta duna nan partisipashon (medezeggenschap) den asuntunan ku ta regardá entre otro nan posishon hurídiko.

Durante e interkambio Señor Sikkel i De Lange a enfoká riba e benefisionan di partisipashon riba nivel di un organisashon, un kompania i / o un instituto edukashonal. Basá riba nan eksperensia partikularmente na Hulanda, nan a mustra riba e echo ku brindando empleadonan e oportunidat di partisipashon, ta krea un ambiente di trabou  mas agradabel.

Práktika a demostrá ku si e empleadonan ta sinti nan mes mas envolví den sierto klase di desishonnan, ta duna indikashon di un produktividat mas haltu. Esaki ta benefisioso pa e dunadó di trabou i konsekuentemente pa e organisashon o kompania envolví.

Riba e kombinashon di potrèt por mira algun konsehero di sekretariado di SER i CGOA huntu ku señores Sikkel i De Lange.