Delegashonnan tékniko di Konsehonan Sosial-Ekonómiko (SER) di Kòrsou i Sint Maarten ta komprometé nan mes pa fortifiká kolaborashon institushonal

Intensifikashon di lasonan di kolaborashon riba nivel institushonal i pa kohuntamente organisá charlanan, simposia i tayernan riba temanan sosial-ekonómiko ku pa e paisnan di Karibe den Reino ta aktual i relevante. Esakinan ta algun di e palabrashonnan ku e delegashonnan tékniko di e Konsehonan Sosial Ekonómiko (SER) di Kòrsou i  Sint Maarten a hasí ku otro durante un enkuentro di trabou ku a tuma lugá djaluna mainta 9 di aprel den e sala di reunion di SER di Kòrsou na Ansinghstraat. Durante e enkuentro di trabou akí, SER di Sint Maarten tabata representá pa su direktor/sekretario-general sr. Gerard Richardson, kompañá pa un konsehero hurídiko sra. Daniële F. Choennie-Babel. Di parti di SER Kòrsou tabata presente sr. Raúl  Henriquez, ku a hasi un bishita di  kortesia djamars dia 3 di aprel último na e SER di Sint Maarten i e konseheronan sra. Sharlyn Villáreal-Curial, sra. Miloushka Sboui-Racamy, sra. Sonja Boersma i sra. Ingrid Bernadina-Provence. E delegashonnan a ekspresá nan deseo i boluntat pa stimulá mas interkambio di eksperensia riba nivel institushonal, pa siña di otro i pa konhuntamente organisá proyekto- i programanan di trabou.
A papia riba e posibilidat pa riba korto plaso organisá un simposio, huntu ku SER di Aruba, riba e tema di indokumentashon, migrashon ilegal i refugiadonan, ku pa tur tres pais i pa henter Reino ta relevante i aktual, konsiderando e implikashonnan sosial-ekonómiko serio ku e desaroyo aki por tin.
Mas aleu a interkambiá di pensamentu ku otro riba e ambishon di SER Kòrsou pa sigui fortifiká lasonan di kooperashon regional den kuadro di e ret CESALC (Consejos Económicos y Sociales de América Latina y del Caribe) i tambe riba nivel mundial relashoná ku e Asosashon Internashonal di Konsehonan Sosial Ekonómiko i institutonan similar (AICESIS).
SER di Sint Maarten a ekspresá enfátikamente ku e ta kompartí e vishon aki.

Riba e foto: e delegashonnan tékniko den kombersashon ku otro.