Mishon di Inteligensia Artifisial na Silicon Valley ta duna SER konosementu práktiko pa fortalesé su trabou di konsehá i pa kontribuí na un Kòrsou mas prepará pa futuro

Willemstad, 18 di mei 2026 — Konseho Sosial-Ekonómiko (SER) a saka siñansa importante for dje mishon di inteligensia artifisial (IA) na Silicon Valley. E lèsnan akí ta importante tantu pa e trabou di konseho di SER, komo pa e debate mas amplio enkuanto futuro di trabou, enseñansa, abilidatnan impresarial i servisio públiko na Kòrsou.

E mishon di konosementu, ku a tuma lugá di 3 pa 8 di mei último, tabata un inisiativa di Universidat di Kòrsou (UoC). UoC a tuma e inisiativa akí pasobra ta premirá ku inteligensia artifisial lo tin un impakto grandi riba sektornan importante di ekonomia di Kòrsou, spesialmente den servisio finansiero i otro organisashonnan ku ta traha intensivamente ku dato. Pa UoC, e pregunta fundamental tabata: kon Kòrsou por usa e bentaha di produktividat ku IA ta trese kuné pa krea konosementu nobo, mehorá servisio i stimulá mas kresementu ekonómiko, sin pèrdè empleo di balor haltu ni talento humano?

E mishon a konta ku sosten di Minister di Enseñansa, Siensia, Kultura i Deporte (OWCS), señor Sithree “Cey” van Heydoorn. E sosten ei tabata konektá ku e proseso nashonal mas amplio rondó di inteligensia artifisial. Ta konsiderá e lèsnan optené na Silicon Valley komo un aporte direkto na desaroyo di un strategia nashonal di IA pa Kòrsou, alabes komo un invershon den konosementu i koperashon pa futuro di nos isla. Den e proseso nashonal ei, gobièrnu a designá  e Outoridat Regulatorio di Kòrsou (RAC) pa koördiná, huntu ku otro partnernan relevante, e proseso pa yega na un strategia nashonal di IA.

Pa SER partikularmente, e mishon tabata relevante debí ku inteligensia artifisial no solamente ta un asunto di kompanianan teknológiko òf di spesialistanan. IA ta mishi ku e manera ku hende ta traha, kompania ta kompetí, hóbennan ta prepará nan mes, tambe kon ta organisá i prepará servisio i maneho públiko. P’esei, e pregunta sentral no ta solamente kiko IA ta hasi posibel téknikamente, sino prinsipalmente kon Kòrsou por usa e teknologia akí na un manera responsabel, husto i dirigí riba metanan konkreto.

E mishon a konfirmá ku IA ta ofresé oportunidat pa ordená kantidatnan grandi di informashon mas lihé, kompará opshonnan di maneho públiko mas efisiente, analisá tendensianan sosial ku mas presishon i fortalesé trabou di konseho ku un base empíriko mas sólido. Pa un órgano di konseho manera SER, esaki por kontribuí na preparashon mas rápido, mihó análisis di temanan, un balanse mas prudente di opshonnan di polítika i komunikashon mas kla ku Gobièrnu, partnernan sosial i komunidat en general.

Na mes momentu, ta enfatisá ku IA nunka mester remplasá kriterio humano. Interpretashon hurídiko, balansá interesnan, responsabilidat funshonal i diálogo sosial ta keda debernan síviko. E prinsipio akí ta kuadra ku e posishon ku SER a ekspresá anteriormente: Por huza IA komo un instrumento balioso pa sostené su trabounan, pero solamente bou di kondishonnan di supervishon final humano, protekshon di dato personal, kalidat, integridat i kontrolabilidat.

E balor agregá pa Kòrsou ta sinta prinsipalmente den e tradukshon práktiko di e lèsnan. IA por kontribuí na mihó servisio públiko, empresanan mas produktivo, uso mas inteligente di labor skars, inovashon den sektornan manera turismo, servisio finansiero, kuido i enseñansa, i mihó preparashon di hóben i trahadó pa inovashon. Pero esaki ta eksigí regla kla, formashon, supervishon i koperashon entre Gobièrnu, sektor privá, sindikalismo, institutonan di enseñansa i mundu akadémiko.

“E mishon a konfirmá ku IA no ta algu di un futuro lejano mas, sino un realidat ku ta impaktando Kòrsou kaba,” asina Raul Henriquez, Direktor/Secretario General di SER, a indiká. “Pa SER, e pregunta klave ta kon nos por usa IA na un manera ku ta fortalesé e kalidat di maneho públiko i di trabou di konseho, sin debilitá responsabilidat humano, seguridat hurídiko i konfiansa públiko.”

P’esei, SER no ta mira e mishon komo un punto final, sino komo un punto di salida pa tradusí e lèsnan atkerí aki na un manera midibel den e trabou di konseho di SER i den e diskushonnan mas amplio tokante trabou, enseñansa, produktividat, digitalisashon i gobernansa di sektor públiko na Kòrsou. E konosementu hañá lo wòrdu inkorporá den e trabounan futuro di SER riba e tereno akí.

Di e manera akí, e mishon di IA ta kontribuí no solamente na fortalesementu interno di e trabou di konseho di SER, sino tambe na e debate nashonal mas amplio tokante un ekonomia di Kòrsou ku ta mas prepará pa un futuro inklusivo i inovativo.