SER ta mira e plan ku ta regardá shushi di plèstik den un kuadro mas amplio

Willemstad, 12 di mei 2026 – Konseho Sosial Ekonómiko (SER) a emití su konseho riba un proposishon di inisiativa di lei di frakshon MAN-PIN den Parlamento pa kambia e Ordenansa di Òrden Públiko. E proposishon ta trata limitashon di suministro i ofresimentu di produkto di plèstik desechabel, prinsipalmente durante eventonan públiko i ora ta fasilitá òf bende produktonan den espasionan públiko.

E inisiativa di lei tin komo meta pa baha kontaminashon i shushi den espasio i riba vianan públiko, limitando uso di artíkulonan manera envase, empake, saku,kùp, kuchara i tayó  , i pone responsabilidat mas kla riba hende ku tin pèrmit, organisadó i suministradónan pa rekohé shushi na un manera korekto. E problema aki ta bisto riba kaya, na kosta i durante eventonan públiko na Kòrsou, sinembargo e ta forma tambe parti di un diskushon internashonal mas grandi riba kontaminashon di medio ambiente ku residuo di plèstik, ekonomia sirkular, salú públiko i kapasidat di gobièrnu pa introdusí reglanan ku por funshoná mas efektivo den práktika.

Ta trata di un vershon adaptá di un proposishon di inisiativa di lei ku for di febrüari 2020 kaba a keda presentá na SER. E tempu ei, SER a duna konseho na yüli 2020. Den e reëvaluashon aki, SER no a mira e proposishon solamente komo un medida medioambiental, sino tambe komo un tema sosioekonómiko, hurídiko i di ehekushon públiko. E pregunta prinsipal no ta solamente si ta bon pa redusí plèstik pa un solo uso, sino kiko mester ta na òrdu pa e medida realmente por funshoná.

SER a evaluá e proposishon for di diferente ángulo. A wak te na ki grado e medida por yuda redusí shushi relashoná ku plèstik, si e regla ta sufisientemente kla den sentido hurídiko, si e por ehekut’é p’esnan ku ta duna pèrmit i esnan ku mester kontrolá, i ki konsekuensia e por tin pa empresario i konsumidó. Tambe a tene kuenta ku disponibilidat i preis di produktonan alternativo, posishon di empresa chikí, importansia di komunikashon kla pa públiko en general i nesesidat di un periodo di transishon ku ta realístiko.

E análisis ta sali for di un punto importante: shushi di plèstik no ta un problema ku por resolvé ku un prohibishon so. Un limitashon di produkto desechabel por tin mas efekto si e forma parti di un strategia mas ámplio ku ta inkluí prevenshon di shushi, resiklahe, kambio di komportashon, kontròl efektivo i evaluashon despues di implementashon. Den un ekonomia manera esun di nos ku pa un gran parti ta dpependé di turismo, kalidat di nos medio ambiente, nos salú públiko, limpiesa di espasionan públiko i kresementu ekonómiko ta kosnan ku ta fuertemente konektá ku otro.

Netamente pa e motibu ei, SER a pone énfasis riba e kondishonnan ku ta nesesario pa por apliká e inisiativa di lei, kontrol’é i asept’é den práktika. Esaki ta inkluí definishonnan hurídiko kla, responsabilidat evidente pa titularnan di permit i esnan ku ta suministrá, kapasidat realístiko pa kontrolá efektivamente, informashon na tempu pa empresario i konsumido, i sufisiente tempu p’e sektor afektá por adaptá su mes.

Asina, e konseho ta pone e proposishon den un kuadro di maneho mas ámplio. Redusí shushi di plèstik no ta enserá solamente prohibishon di algun produkto, sino tambe trata na strukturá e problema : ken ta rekohé e shushi, ken ta kontrolá, kua alternativa(nan) tin, kon por prepará un empresario i kon ta kuantifiká i kalibrá  e medida. E kontestanan riba e preguntanan aki lo determiná si e proposishon por yuda realmente na un Kòrsou mas limpi, mas salú i mas atraktivo pa biba, traha i bishitá.