Mesa rondó di SER ta pone enfoke riba kapasidat pa pone maneho den práktika

Kòrsou ya konosé su retonan prinsipal

WILLEMSTAD, 8 di aprel 2026 — Kòrsou no asina tantu ta karesé di kapasidat analítiko, sino mas bien ta karesé di kapasidat pa implementá. Esei tabata e liña kòrá ku a sali na kla durante e mesa rondó riba desaroyo ku Konseho Sosial-Ekonómiko di Kòrsou (SER) a organisá djaweps dia 2 di aprel último ku partisipashon di representantenan di Nashonnan Uní i otro aktornan relevante. E reunion tabatin komo meta pa re-enforsá i aliniá e bista aktual di Nashonnan Uní riba e situashon na Kòrsou, ku mira riba e siguiente kuadro di koperashon pa e periodo 2027-2031. Loke a bira mas kla ta ku e retonan prinsipal dje isla pa largu tempu ya ta konosí, pero ku e traslado for di diagnóstiko pa bai na maneho koherente i akshonnan konkreto ainda – hopi biaha – no ta tuma lugá di forma efisiente.

E konklushon ei a duna e enkuentro un karákter diferente for di un konsulta regular. E diálogo no a konsentrá su mes solamente rondó dje riesgo i retonan ku Kòrsou ta enfrentá, sino mas bien rondó di e pregunta un poko mas inkómodo, esta dikon progreso hopi biaha no ta yega di manera ekilibrá na tur hende. Den e dokumentonan i durante e intervenshonnan, e mesun temanan a bolbe bini dilanti un tras di otro: seguridat di entrada, kalidat di trabou, formashon, enbehesimento di poblashon, kuido, seguridat energétiko, resiliensia klimátiko i kapasidat institushonal di gobièrnu pa mantené un maneho koherente i konsistente. Asina e enfoke dje enkuentro a move den direkshon di e kondishonnan institushonal ku ta nesesario pa hasi implementashon di maneho mas efektivo.

Segun SER, esaki no ta un diskushon puramente akadémiko. E realidat sosial di Kòrsou ta demostrá ku kresementu ekonómiko riba su mes tin un efekto limitá kaminda ainda un gran parti di e poblashon ta sigui den un situashon di vulnerabilidat. Segun e sifranan presentá durante e reunion, desempleo a baha na 7,8% den 2024 i desempleo hubenil na 16,3%, miéntras ku e kantidat di personanan ku tin trabou a subi te kasi 72.000. Na mes momento, 30.4% di hogarnan ta biba bou di e tasa di pobresa. E kombinashon ei — rekuperashon riba papel, pero vulnerabilidat ku ta pèrsistí den hopi kas di famia — a trese durante e mesa rondó dilanti ku e siguiente fase di desaroyo di Kòrsou no por limitá su mes na kresementu so. E ta eksigí mihó trabou, entradanan mas stabil, mas formalisashon i un kapasidat di resistensia sosial i institushonal mas fuerte.

Enbehesimentu tambe a okupá un lugá sentral den e diskushon. Kòrsou tin 156.115 habitante, di kua 33.8% tin 60 aña òf mas. E realidat ei ta toka no solamente nos sistema di salubridat, sino tambe penshun, oferta di trabou, bibienda i sostenibilidat di finansa públiko. Den e sentido ei, e reunion a pone dilanti un biaha mas ku demografia ya pa hopi tempu a laga di ta un asunto sektoral. Awe e ta un faktor struktural ku ta kore atrabes di práktikamente tur aspekto sosioekonómiko dje isla.

Pa SER, presisamente aki Nashonnan Uní por tin un balor agregá den su aporte. No den añadí un otro kapa di análisis, sino den yudá Kòrsou definí su prioridatnan mas mihó, koördiná su maneho ku mas inteligensia i redusí fragmentashon den implementashon. “E reto no ta mas pa Kòrsou deskribí su problemánan ku mas presishon, sino pa alineá mihó maneho públiko, dato i implementashon, pa asina por persibí e reformanan di bèrdat den bida kotidiano di hende”, SER a enfatisá. E enfoke ei ta koïnsidí ku e meta dje mesa rondó, kaminda a mira eksplísitamente riba kua tereno Nashonnan Uní por hasi un diferensia real pa medio di asesorá maneho públiko, sosten tékniko i kapasidat pa influenshá.

Pues, resultado di djaweps 2 di aprel último, no tabata ku Kòrsou a agregá un lista nobo di problema na esnan ku ya ta konosí, sino ku su prioridatnan a keda mas kla deliniá. E debate a apuntá den direkshon di un agènda di desaroyo kaminda no por tratá protekshon sosial, oportunidatnan riba merkado laboral, dato, resiliensia klimátiko, transishon energétiko i fortalesa institushonal mas komo temanan separá. Lo inkorporá e aporte rekohé durante dje reunion den e preparashon dje kuadro nobo di koöperashon di Nashonnan Uní pa 2027-2031. Pa SER, e ophetivo ta kla: un koöperashon ku no solamente ta produsí análisis, sino ku tambe ta yuda transformá konosementu den kapasidat real pa ehekutá.