AICESIS ta presentá informe preliminar na direktor-general athunto di ILO

Ginebra, 13 di yüni 2024 – Den un paso signifikativo pa avansá ku e tema di kresementu inklusivo i desaroyo sostenibel, e Asosiashon Internashonal di Konsehonan Ekonómiko i Sosial i Institushonnan Similar (AICESIS) a presentá resultadonan preliminar di su kuestionario ekstensivo na Organisashon Internashonal di Trabou (ILO). E informe a wòrdu entregá ofisialmente na e direktora general athunto di ILO, Sra. Celeste Drake, pa algun representante di e konseho presidente di e asosiashon internashonal, ku ta Konseho Sosial Ekonómiko di Kòrsou (SER) huntu ku e sekretario-general di AICESIS durante un reunion bilateral formal, ku a tuma lugá dia 12 di yüni último na sede prinsipal di ILO na Ginebra, Suisa.

E informe, prepará pa SER di Kòrsou, ta ofresé un análisis profundo di kon konsehonan, miembro di AICESIS, ta aliniá ku e ophetivo di kresementu amplio i inklusivo, ku indikadonan konkreto, i kon esakinan ta ser integrá den un kuadro global i regional. E informe ta eksaminá ademas kon riba nivel regional i mundial e ophetivonan ta ser konkretisá, kua ta e mekanismonan ku ta ser husá pa apliká esakinan i kon e kolaborashon ta entre e institushonnan miembro di e asosiashon mundial.

E direktor adjunto di ILO Sra. Drake a ekspresá su rekonosementu pa e esfuerso diligente di AICESIS i su institushonnan miembro. “E informe preliminar aki ta testimonio di e kompromiso di AICESIS ku desaroyo inklusivo i sostenibel. E data ku a ser rekoudá i analisá lo kontribuí signifikantemente na nos meta komun di fomentá un kresementu ekitativo i mehorá dialogo sosial na nivel mundial.”

Entrega di e informe ta marká inisio di un proseso di revishon di profundidat di parti di ILO, i e informe final, ku lo sali mas lat e aña aki, lo proporshoná un análisis ekstensivo i rekomendashonnan práktiko pa kontinuá e  aliansa ku ILO, ku ta kompartí metanan komun di sostenibilidat i inklushon.