Komunikado

Migrashon laboral ta un faktor importante pa promové un merkado laboral inklusivo

Willemstad, 31 di mei 2023- ,,Migrashon laboral ta keda un faktor importante pa promové un merkado laboral inklusivo. Probechá di e benefisionan di migrashon laboral no solamente ta kontribuí na kresementu ekonómiko, sino tambe na un sosiedat ku ta balorá igualdat di oportunidatnan i diversidat. Sinembargo, kreashon di un merkado laboral inklusivo ta rekerí un maneho koherente, bon delineá i responsabel.”

Den su último informe, publiká dia 30 di mei último, Konseho Sosial-Ekonómiko (SER) ta presentá su vishon riba e kondishonnan nesesario pa yega na formulashon di un maneho di merkado laboral i un di migrashon pa Kòrsou. Sigun SER, e momentu a yega pa akseptá e balor di migrashon laboral i konstruí un merkado laboral inklusivo ku ta promové tantu kresementu ekonómiko komo koheshon sosial. Pa logra esaki, gobièrnu, empresarionan, sindikatonan i organisashonnan, ku ta representá sosiedat sivil, mester kolaborá ku otro pa krea e infrastruktura i sistemanan di apoyo nesesario.

Share