Komunikado

SER ta emití konseho riba proposishon pa revisá OB

WILLEMSTAD, 3 di mart 2023 – Konseho Sosial Ekonómiko (SER), den su último informe ku a sali e siman aki, ta duna su opinion ekstenso riba e areglonan nobo ku Minister di Finansa kier introdusí den impuesto riba benta (Omzetbelasting, OB).

E areglonan nobo proponé tin di aber spesífikamente ku introdukshon di e posibilidat pa retené i remití parti di OB dor di bankonan lokal, ampliashon di tax and duty-free shopping pa turistanan, eksonerashon di derechonan di importashon riba kompranan den zona liber, apuntá empresanan di plataforma online komo kontribuyente di impuesto riba benta i introdukshon di un sistema di kaha, e asina yamá kasstelsel.

Ku e areglonan proponé e minister kier oumentá ingresonan fiskal den futuro serkano.

Mediante revishonnan den e Ordenansa riba Impuesto di Benta 1999, e Ordenansa riba Tarifa di Derechi di Importashon i e Ordenansa general riba Impuesto, lo intentá aselerá i garantisá entradanan di OB. Den mesun rosea kier hasi un intento, mediante e modifikashonnan legislativo proponé, pa mehorá e posishon kompetitivo di Kòrsou kompará ku otro destinashonnan turístiko den Karibe i konvertí Kòrsou den un destinashon tax & duty-free pa turistanan. Ampliashon di e régimen di kompra tax & duty-free, lo oumentá, na un banda, e nivel di kompranan turístiko, i mas aleu, lo stimulá mas aktividat komersial. Asina ei e pensamentu ta.

E nesesidat di modifiká e Ordenansa riba Impuesto di Benta ta derivá, ademas, pa evitá kompetensia no deseá den situashonnan kaminda empresanan di plataforma online (manera Airbnb i otronan) ofresé servisionan na nòmber di esnan ku ta disfrutá di virtut di propiedat, poseshon o derechi limitá riba vienes inmóbil.

Durante e periodo tras di lomba SER a hasi un análisis profundo riba e medidanan fiskal proponé i a emití su informe e siman aki.

 

Share