Komunikado

SER ta konsiderá hasi un estudio riba impakto di imigrashon riba merkado laboral

WILLEMSTAD, 25 di ougùstùs 2022 – Kua ta e impakto ku imigrashon tin riba ekonomia di Kòrsou? Ki efekto e proseso aki tin riba finansa di gobièrnu? Di ki forma ta apliká maneho pa integrá trahadónan estranhero riba merkado laboral lokal? E maneho aki ta den konkordansia ku esfuersonan ku ta wòrdu hasí pa aktualisá i modernisá merkado laboral lokal konforme loke a ser palabrá ku Hulanda den e pakete di pais (Landspakket, i si esei ta e kaso, kon esaki ta relatá su mes na e ophetivo stratégiko di e gabinete aktual, manera formulá den e programa di gobernashon pa e periodo 2022-2025, pa oumentá partisipashon laboral di ‘’yunan di tera” durante e periodo di gobernashon aki? Ki tipo di formanan di kooperashon i o aliansanan stratégiko por ser establesé pa respondé di un forma efikas riba último desaroyonan ku tin den ámbito di migrashon, partisipashon laboral i mobilidat laboral na Kòrsou? Konseho Sosial Ekonómiko (SER) ta konsiderando e posibilidat pa hasi un estudio ekstenso ku posiblemente lo por duna un kontesta riba e preguntanan ariba menshoná i otro preguntanan relatá na nan. E estudio aki lo ta un kontinuashon di e simposio ku a tuma lugá dia 9 i 10 di mei 2019 na Willemstad, Kòrsou, i ku a ser organisá konhuntamente ku e konsehonan sosial ekonómiko di Aruba i di Sint Maarten, riba e tema sentral

Entretantu, komo resultadonan konkreto di e simposio ei, SER di Kòrsou a publiká dos estudio na 2020 i 2021. E promé estudio ta trata di e futuro di e seguro general di behes, AOV, kaminda a analisá sostenebilidat di e fondo di AOV hasiendo uso di diferente senario di migrashon https://ser.cw/files/2020/03/036-2020-SER.pdf a ). E di dos estudio, realisá pa SER, a konsentrá su mes riba e kontribushon ku olanan migratorio, a bini ta hasi durante dékadanan na desaroyo sosial-ekonómiko di Kòrsou https://ser.cw/files/2021/06/054-2021-SER-1.pdf).

Entre otro, komo konsekuensia di e krísis di COVID-19 i e guera entre federashon Ruso i Ukrania, kostonan di transporte na nivel mundial a oumentá drástikamente, igual ku preisnan di kombustibel i di grano, loke a kondusí na un oumento di e tasa di inflashon na Kòrsou te na 5,1 porshento na yüni 2022 (Ofisina Sentral di Statistik, CBS) debí na e fuerte dependensia di importashonnan. Pa un parti, debí na e desaroyonan i akontesimentunan aki, e dinámika riba merkado laboral lokal tambe a kambia. E panorama ainda ta unu ku ta karakterisá su mes pa un nivel di desempleo general altu i inakseptabel (19,1%), spesialmente bou di hóbennan (42,2%), ounke tin señalnan positivo ku lo start ku proyektonan nobo ku lo kondusí na oumento di empleo a mediano plaso. Tambe tin desaroyonan favorabel den e sektor di hospitalidat – un di e pilarnan prinsipal ekonómiko di e isla – kaminda tambe ta spera ku esakinan lo kondusí na un oumento di demanda di forsa laboral.

E pregunta sentral aki ta si e kapasidat i/o forsa laboral disponibel riba merkado lokal, ku aktualmente no ta aktivo, por wòrdu utilisá ku sufisiente efikasia, i si esei ta e kaso, kua ta e kondishonnan básiko ku mester kumpli kuné. Si di otro banda uso efikas di e forsa laboral no aktivo aki no ta prepará sufisientemente pa por atendé ku demandanan nobo riba merkado laboral, ki kombinashon di instrumentonan di maneho (kursonan di rekapasitashon i preparashon di “yunan di tera” en kombinashon ku un maneho di migrashon planifiká i bon guiá por desplegá.

Ainda tin ku diskutí, kon, den ki forma i den ki término di tempu lo inisiá ku e estudio.
Loke ta signifikativo, sinembargo, ta e rekonosimentu ku un estudio di tal índole, realisá pa un órgano konsultivo di gobièrnu di parlamento, esta SER, lo por duna un kontribushon supstansial na realisashon di e ophetivonan manera formulá den e programa di gobernashon 2022-2025 di e gabinete aktual ku ta basá pa un gran parti riba e akuerdo di gobernashon di aprel 2021, e pakete di pais, kumbiní ku Hulanda, i e ophetivonan di desaroyo sostenibel, e asina yamá Sustainable Development Goals (SDG’s) di Nashonnan Uní.

 

Share