SER ta sigui lansamentu di instrumento di ILO pa outo- evaluashon

WILLEMSTAD/GINEBRA, 15 di novèmber 2021 – E Organisashon Internashonal di Labor (ILO) a lansa awe e instrumento pa outo-evaluashon (SAM-SDI)  ku anteriormente nan a anunsiá, pa yuda nan estadonan miembro mehorá efektividat i inklusividat di nan institutonan nashonal di diálogo sosial, manera SER. Konseheronan di e sekretariado di SER a sigui e lansametu virtualmente. A desaroyá e método akí komo parti di e plan di akshon pa diálogo sosial i tripartitismo (2019-2023) ku Konseho di direktiva di ILO a ratifiká durante di e seshon di mart 2019. E plan ta implementá tambe e resolushon i konklushonnan tokante diálogo sosial di e Konferensha di Labor (ILC) di yüni 2018.

SAM-SDI  (na ingles: self-assessment method for social dialogue institutions) ta guia e aktornan di diálogo sosial – gobièrnunan – organisashonnan di dunadó di trabou i di trahadó – dor di un proseso ku ta analisá e inklusividat i efektividat di nan instituto di diálogo sosial. Basá riba e análisis akí nan por desaroyá un plan di akshon i implementá esaki pa asina e instituto oumentá su efektividat den desaroyo di maneho di gobièrnu. Diálogo sosial ku ta basá riba respèt pa libertat di asosiashon i e derechi pa negosiashon kolektivo i efektivo, tin un papel krusial ora ta definí maneho pa promové hustisia sosial i progreso sosial i ekonómiko.

Instanshanan institushonalisá pa diálogo sosial, manera SER, tin un papel klave den realisashon di metanan sostenibel di desaroyo di Nashonnan Uní (SDG-nans), partikularmente SDG-16, ku tin komo meta promové lo siguiente: un sosiedat inklusivo pasífiko pa un desaroyo duradero, akseso na derechi pa tur hende i institutonan efisiente, responsabel i inklusivo riba tur nivel.

Diálogo sosial tambe ta un parti esensial di SDG 8, ku ta enfoká riba kresementu ekonómiko duradero i inklusivo, oportunidat di trabou total i produktivo i trabou desente pa tur hende. Ademas e ta sentral den implementashon di SDG 5 tokante igualdat di género.

E SAM-SDI ta konsistí di seis paso ku ta konektá ku otro. E ta optenibel online na ingles, franses i spaño. Klek akí pa e vershon na ingles.