‘MAS KONSIENTISASHON PA VIOLENSIA I INTIMIDASHON NA BOKA DI TRABOU’

Violensia, tèrmentu i intimidashon (seksual) ta trese un problema na trabou i den sírkulo di trabou. Aunke ta falta sifranan eksakto, e kerensia ta ku na un dado momentu un porsentahe, ku bo no por ignorá, di e forsa laboral di Kòrsou, lo enkontrá violensia i intimidashon (seksual) na boka di  trabou. Ta p’esei denter di SER tin un interes kresiente pa e tema akí i ta insistí pa hasi mas investigashon pa yega na informashon útil i konfiabel. Esaki di akuerdo ku e dos instrumentonan ku e Organisashon Internashonal di Labor (ILO) (international labour standards) – Konbenio 190 i Rekomendashon 206 –   a aseptá na 2019 i ku a trata na regulá e manera di atendé ku violensia i intimidashon den sírkulo di trabou.

Pa un bon komprendementu di e instrumentonan di e tratado legal i nan implikashon, dia 26 di òktober último SER a partisipá, riba nivel tékniko, na un webinar kual e ILO di Karibe a organisá ku su enfoke tabata pa enkurashá mas tantu isla-/paisnan di region posibel pa ratifiká e Kombenio 190 i  Rekomendashon 206 di ILO. E Webinar ta parti di ‘#RatifyC190 campagne’ ku tin e meta pa amplia konosementu di e tratadonan di ILO riba nivel regional i stimulá akshonnan dirigí riba lucha kontra violensia i intimidashon den e ‘world of work’.

Apesar ku algun pais for di region a kontribuí masha aktivo ku realisashon di ambos instrumento di e tratado legal, di kual Kombenio 190 a drenta na vigor dia 25 di yüni 2021, a resultá ku solamente Argentina, Ecuador i Uruguay a ratifiká a kombenio akí. Meskos ku e restu di e region di Karibe, Kòrsou komo parti di Reino di Ulanda, ainda no a hasi petishon pa kobalidá e Kombenio 190 (un tratado legal) i e Rekomendashon nr. 206 (un guia kon pa mehorá implementashon di e provishonnan di e Kombenio).

Durante e wèbinar, ku a konta ku partisipashon di algun dignatario for di region di Karibe, a profundisá  riba e punto di salida  ku e Kombenio 190 ta basá riba e prinsipio di trato igual i ku e prinsipio akí ta un di e ‘fundamental principles and rights’  (prinsipio fundamental i derecho) di ILO i tambe un prinsipio básiko den tratadonan di derechi humano internashonal i regional i òrden hurídiko demokrátiko nashonal. Durante e wèbinar a enfatisá ku e punto di salida di trato igual ta bolbe bini dilanti na diferente lugá den e Kombenio 190. For di e introdukshon di e kombenio kaba ta atmití ku violensia i intimidashon den ambiente di trabou ta produsí violashon di derechinan humano, ta forma un menasa pa oportunidat igual i no ta kuadra ku trabou digno (decent work).

Por haña mas tokante e wèbinar i e #ratify C 190 campagne (tambe un campagne toolkit) riba:

https://www.ilo.org/global/about-the-ilo/newsroom/news/WCMS_807463/lang–en/index.htm

Mas informashon di fondo tokante Kombenio 190 por haña riba

https://www.ilo.org/global/topics/violence-harassment/lang–en/index.htm