SER ta risibí e komishon di progreso di e proyekto Akuerdo di kresementu

Willemstad, 20 di novèmber di 2019 – e komishon ku ta monitoreá e progreso di e proyekto Akuerdo di kresementu, a hasi un segundo bishita na e Konseho Sosial-Ekonómiko (SER) riba 19 di novèmber 2019. Meta di e bishita tabata pa sera konosí  mas djaserka ku e komishon ku ta monitoreá e proyekto i e miembronan di SER, i pa nan tende e punto di bista di SER pa loke ta trata e kontenido di e diferente metanan segun deskribí den e Akuerdo di kresementu. Un bishita previo ku SER, den un konstelashon poko mas chikitu, a tuma lugá riba 3 di sèptèmber último.

E komishon di progreso a wòrdu instalá riba 1 di ougùstùs 2019 i tin komo tarea monitoreá e progreso di e akuerdonan i realisashon di e metanan konforme e Akuerdo di kresementu; enkurashá i duna empuhe, duna sosten i konsehá; raportá na e direktornan responsabel di e paisnan tokante progreso i ehekushon. A firma e Akuerdo di kresementu riba 12 di yüli 2019 dor di e gobièrnunan di Kòrsou i  Ulanda.
E komishon di progreso ta konsistí di señor A. Romero- presidente, señora A. Van der Pluijm-Vrede, miembro di parti di Kòrsou, señor P. Van den Berg, miembro di parti di Ulanda. Un sekretariado kolektivo ta respaldá e komishon ku ta konsistí di señor B. Koks, sekretario di parti di Ulanda i señora A. Kleinmoedig, sekretario na nòmber di Kòrsou. Señor Romero no por a asistí na e reunion.
Na nòmber di SER tabata presente na e reunion, señor C. Rojer, miembro independiente, e señornan P. Cova i J. Zimmerman, reperesentantenan di sindikatonan, i e señornan J. Kusters i R. Lieuw, representantenan di e organisashonnan empresarial. E demas miembronan no por tabata presente na e reunion.
Di parti di Bureau Secretariaatvoering SER/ROA/GOA tabata presente e Sekretario General di SER, señor R. Henriquez, i e konseheronan señora B. Perquin, señora Curial-Villarreal i señora M. Sboui-Racamy.

E Akuerdo di Kresementu tin komo punto di salida e strategia di kresementu. Gobièrno di Kòrsou a aprobá e strategia di kresementu i tin komo tres punto di lansa di mas importante (i) stimulá kresementu di ekonomia struktural; (ii) fortifiká e manheo finansiero; (iii) i  fortifiká e forsa di e aparto públiko.
A inkluí dos asunto den e Akuerdo di kresementu: e agènda sosial i enseñansa.

Durante di e enkuentro a trata tópikonan manera entre otro reforma ekonómiko, medidanan  ku èkstra rekargo versus medidanan pa baha gastu, e estado di progreso di asuntonan relashoná ku ehekushon di e proyekto Reforsá Kòrsou, e pregunta si e Akuerdo di kresementu a tene kuenta ku posibel klousura di e refineria ku lo resultá den un oumento enorme di desempleo, e posibilidatnan pa asistensia tékniko, i rekomendashonnan di parti di SER den e sup áreanan di e Akuerdo di kresementu.
Tambe a subi mesa e insentivonan ku Ulanda lo pone disponibel si logra e metanan establesé den e Akuerdo di kresementu. E insentivonan akí ta den forma di finansiamentu (un total di 180 mion florin) ku  lo hasi e reforma ekonómiko tambe posibel.

E komishon di progreso ta raportá kada tres luna na e direktornan responsabel di e paisnan konserní. SER a enfatisá  ku publikashon di e informenan, den todo kaso informenan pa e partidonan sosial denter di e komunidat empresarial i pa SER, ta sumamente importante pa logra integrashon sosial.

E komishon di progreso ta reuní mínimo kada tres luna pa deliberá riba e progreso di e Akuerdo di kresementu. Riba surgerensia di SER pa mantené otro tambe bon informá riba un base trimestral riba progreso i implementashon di e Akuerdo di kresementu a wòrdu risibí positivamente pa e komishon.

Riba potrèt: impreshon di e kombersashonnan entre SER i e komishon di progreso di e proyekto Akuerdo di kresementu.