E señal ofisial pa ranka sali ROA-SBO

WILLEMSTAD, 6 di novèmber 2019 – Ku entrega di kopianan di e benoemingslandsbesluit  na e miembronan basá riba e Ordenansa enseñansa vokashonal segundario i edukashon (P.B. 2008, no 37) di aprel di e aña akí, e Konseho di Enseñansa i Labor (ROA) a duna Minister di Enseñansa, Siensia, Kultura i Deporte (OWCS) señora Marilyn Alcala-Wallé e señal ofisial pa ranka sali entrante 5 di novèmber. Pa e okashon akí e Direktor di Bureau Secretariaatvoering SER/ROA/GOA, señor Raul Henriquez tambe tabata presente. Tarea di ROA ta pa konsehá e Minister di OWCS i otro Ministernan riba trayektonan pa optimalisá  sinkronisashon di  nivel di Enseñansa vokashonal segundario (SBO) ku e merkado laboral i riba tópikonan relashoná ku enseñansa i merkado laboral. Konforme artíkulo 11 di e Ordenansa di ROA (P.B. 2019, no.20) ta Bureau Secretariaatvoering SER/ROA/GOA ta responsabel pa  Secrtariaatvoering di ROA.

E siguiente personanan ta nombrá pa un periodo di dos aña komo miembro di ROA-SBO: señora Bionda Fonseca  i señor Raymond Jamanika (representando doñonan di trabou) , i e señores Edward St. Jacobs i Kenneth Valpoort (di parti di trahadónan) i señor Ruud Thuis, señora Melrose Cornelia- Ortela i señora Feiijidi Narvaez-Ayubi (komo ekspertonan independiente).

Inisialmente, SER a konsehá pa instalá ROA-SBO komo un organisashon miksto, ku e tareanan deskribí segun e Ordenasa enseñansa vokashonal segundario kombiná ku tareanan ku e sentro Kenniscentrum Beroepsonderwijs Bedrijfsleven (KBB) tabata hasi den pasado riba tereno di kapasitashon di dosente i sertifikashon di e empresanan den kuadro di formashon vokashonal profeshonal práktiko (stazje). Tambe SER a rekomendá pa aparte di ROA-SBO instalá un kolegio di konseho independiente superior di ekspertonan, ku por ehèmpel e nòmber ’Toekomst van Werk en Educatie (TWE).

Tarea di e kolegio di konsulta superior TWE, ku mester a wòrdu establesé konforme artíkulo 72 di e Konstitushon, lo tabata , mirando e velosidat i posibel impakto di kambionan teknológiko i otro mega tendensianan riba problemátikonan relashoná ku sinkronisashon di enseñansa i merkado di labor (e.o. globalisashon i sostenibilidat), desaroyonan riba e demanda di labor riba merkado lokal i internashonal i desaroyonan den e sistema edukashonal kompletu – i no solamente SBO – pa analisá i formulá rekomendashonnan riba tereno di maneho di enseñansa i merkado laboral. Rekomendashonnan riba tereno di maneho di enseñansa mester kubri tur fase i nivel di enseñansa, ku e meta pa desaroyá kompetensianan pa e merkado laboral di futuro i e institushon di enseñansa, pa asina mihó posibel ahustá. TWE mester duna konseho intersektoral na gobièrnu i Staten sea riba petishon òf no solisitá tokante e liñanan prinsipal di e maneho di enseñansa i merkado laboral. Naturalmente TWE mester keda mantené kontakto tambe ku e ROA-SBO ku aktualmente ta operashonal.

Riba e potrèt di man robes pa drechi: Cor de Graaff (empleado di  Minister di OWCS), Raul Henriquez, Bionda Fonseca, Edward St. Jacobs, Minister Alcala-Walle, Feiijidi Narvaez-Ayubi, Kenneth Valpoort, Suzanne Larmonie (Beleidsdirecteur OWCS) i Wladimir Kleinmoedig (Direktor Uitvoeringsorganisatie Onderwijs en Wetenschap di e Ministerio di OWCS)