Delegashon di SER’nan di e parti Karibense di Reino ta bishitá e komishon di konseho pa asuntonan di ekstranhero

Den Haag, 15 di òktober 2019 – Un delegashon di Konsehonan Sosial-Ekonómiko (SER’nan) di Aruba, Kòrsou i Sint Maarten a hasi un bishita di trabou na e komishon di Konseho pa Asuntonan di ekstranhero (ACVZ) na Den Haag djaluna 14 di òktober. E delegashon tabata konsistí di e presidente di SER di St.Maarten i e sekretarionan general Felix Bijlhout di SER di Aruba, Raul Henriquez di SER di Kòrsou i Gerard Richardson di SER di St. Maarten. E meta di e bishita di trabou tabata pa familiarisá ku e tareanan di konsulta di e komishon despues di e resultado di e simposio konhunto ku e SER’nan di e tres paisnan a organisá na Kòrsou na kuminsamentu di mei di e aña aki tokante migrashon (pa trabou) relashoná ku e desaroyo sosial-ekonómiko.

E Komishon di konsulta pa Asuntonan di Ekstranhero ta un kolegio di konsulta independiente ku ta duna konseho riba petishon òf no solisitá na gobièrnu Ulandes i e parlamentu riba e derechi i e maneho di ekstranheronan. E rekomendashonnan di maneho ta dirigí riba e liñanan prinsipal di e maneho di ekstranhero. E komishon ta eksaminá si e maneho tabata efisiente i efektivo i ta duna e rekomendashonnan nesesario pa mehoransa.

Durante e kombersashon ku e presidente Koos Richelle di ACVZ, sekretario/direktor Wolf Mannens i konsehera Sonja Avontuur , e SER’nan di e paisnan di Karibe a diskutí ampliamente riba e opservashonnan, ku tambe a bini dilanti durante e simposio riba migrashon organisá konhuntamente, ku e problemanan di ekstranhero i migrashon ta importante pa e sostenibilidat di e sistema di seguridat sosial di Aruba, Kòrsou i Sint Maarten mirando e oumentu di envehesimentu di  poblashon, hende nobo i emigrashon.

Komo ku ACVZ ta duna konseho riba tópikonan manera migrashon di labor/konosementu, migrashon di famia, maneho di regreso i integrashon, e SER’nan di e tres paisnan di Karibe a haña ta relevante pa elaborá mas profundo riba esakinan i otro temanan ku e komishon di konsulta.

E kombersashon a klousurá ku un akuerdo di koperashon entre e instansianan di konseho den e forma di interkambio di eksperensia, konosementu i ekspertisio ku pa ambos ta benefisioso i pa elaborá mas riba esakinan den futuro.