Komunikado

A instalá Raad van Onderwijs en Arbeidsmarkt (ROA)

Sosten na ROA ta kai bou di responsabilidat di Bureau Secretariaatvoering SER/ROA/GOA

Riba 9 di òktober 2019 Minister presidènt sr. Eugène Rhuggenaath den kompania di e Minister di Enseñansa, Siensia, Kultura i Deporte, sra. Marilyn Alcalá-Wallé, a instalá Raad van Onderwijs en Arbeidsmarkt.

E instalashon di e Raad van Onderwijs en Arbeidsmarkt (despues: ROA)  ta konforme artíkulo 70, insiso dos, di e Ordenansa di 22 di mei 2008,  ku ta establesé un regulashon relashoná ku e edukashon sekundario vokashonal i di enseñansa (Landsverordening secundair beroepsonderwijs en educatie) (P.B. 2008, no. 37), i ta ankrá den e Ordenansa di 9 di aprel 2019, no.19/0753, ku ta enserá e establesimentu di e instituto di Raad van Onderwijs en Arbeidsmarkt (Landsbesluit Raad van Onderwijs en Arbeidsmarkt) (P.B. 2019, no. 20), ku a drenta na vigor 9 di aprel 2019.

E ordenansa en kestion ta kontené stipulashonnan tokante e instalashon i tareanan di un ROA. E ROA tin komo tarea konsehá e minister di OWCS i pa medio di intervenshon di e minister konsehá otro ministernan tokante desaroyonan di enseñansa i merkado laboral. Tareanan spesífiko ta pa konsehá e minister tokante rekonosementu di kursonan, términonan final di e kursonan di edukashon ku ta bini na remarke pa un lisensia, i e rekisitonan ku ta wòrdu stipulá na e materianan ku ta forma parti di e èksamen pa haña un diploma di enseñansa sekundario vokashonal i enseñansa mas avansá pa middenkader. Tambe ROA ta duna konseho riba regulashon ministrial ku un funshon general, manera ta indiká den artíkulo 18, insiso dos, di e Ordenansa enseñansa sekundario vokashonal i enseñansa.  E regla akí ta relashoná ku skucha ROA tokante establesé i mantené koherensia i e totalidat diversifiká di tèrmino final, repartí den kualifikashon parsial, pa kursonan ku ta importante pa e empresanan òf e kategoria di funshon konserní.

ROA ta konsistí di shete miembro, esta representantenan  empresarial, e sektor sindikal, enseñansa i gobièrno. Esnan nombrá ta: sra, Bionda Fonseca i sr. Ramond Jamanika (representante dunadó di trabou); sr. Edward St. Jascobs i sr. Kenneth Valpoort (representante di trahadó);  sr. Ruud Thuis (eksperto riba tereno di maneho di enseñansa i labor, apuntá pa e minister) sra. Melrose Cornelia-Ortela i sra. Feiijdi Narvaez-Ayubi (representantenan di enseñansa públiko i spesial).

Den artíkulo 11, insiso 1, di e ordenansa menshoná ta stipulá ku e Bureau Secretariaatvoering SER/ROA/GOA ta keda enkargá pa sostené e Konseho. Kon e sosten mester ta presis, mester wòrdu determiná ainda.

Den su konseho di 14 di ougùstùs 2018 ku number di referensia106/2018-SER, SER a konsehá riba e plan initiativa di diseño ku ta regla e instituto, organisashon, komposishon i e outoridat di Konseho di Enseñansa i Merkado Laboral na Kòrsou. Den e Memorie van Toelichting di e proposishon di intiativa di diseño ta separá klaramente ROA for di enseñansa sekundario vokashonal (ROA-SBO). E konseho previamente menshoná ta trata di un kolegio konsultativo permanente i independiente ku ta duna konsehonan den liñanan general relashoná ku enseñansa i formashon den su totalidat i ta sali for di un aserkamentu integral di enseñansa i formashon ku despues tambe ta wòrdu konektá ku desaroyo ekonómiko” E petishon pa konseho ta trata di un kolegio di konseho permanente ROA.

Ser lo profundisá riba e konseho basá riba e nesesidat pa tantu un ROA riba nivel di SBO (manera e ta instalá aktualmente) komo un Kolegio di Konseho pa e Futuro di Trabou i Edukashon (TWE), kaminda e último ta duna konseho riba tereno di maneho di enseñansa pa tur fasenan i nivelnan di enseñansa, dirigí riba formulashon di kompetensianan pa e merkado laboral di futuro i e organisashon di ensenañsa, pa asina nan por kontektá mihó posibel. SER ta yega na e konklushon basá riba su análisis ku un kolegio konsultativo separá riba tereno di enseñansa i merkado laboral no solamente ta útil i nesesario, pero asta masha esensial den kuadro di e retonan di Future of Work. For di e punto di bista sosialekonómiko, SER ta konsiderá sumamente importante ku e workforce aktual i pa futuro mester ta prepará pa e futuro di trabou.

Por hañé e koseho riba e wèpsait di SER (www.ser.cw).

Ku e instalashon di un ROA riba nivel di SBO ta en todo kaso e promé paso na e proseso pa un mihó konekshon entre e edukashon sekundario vokashonal riba e merkado laboral.

Riba e potrèt:
Minister-presidènt Eugène Rhuggenaath, sr. Ruud Thuis, sr. Kenneth Valpoort, sra. Suzanne Larmonie, sr. Raymond Jamanika, Minister Marilyn Alcalá-Wallé, sra. Feiijdi Narvaez-Ayubi, sr. Edward St. Jacobs i sra. Bionda Fonseca.

Share