Preparashonnan pa e fiesta sentenario di ILO den ful suin

Willemstad, 7 di yüni 2019 – Durante un kombersahon di Skype riba 6 di yüni 2019 ku señor Shingo Miyake, spesialista di e Organisashon Internashonal di Labor (ILO) riba tereno di derechonan di trahadó i normanan internashonal di trabou i kende ta traha na ILO-Decent Work Team and Office for the Caribbean na Port of Spain, Trinidad & Tobago, i miembronan di e delegashon tripartit di Kòrsou ku otro siman lo partisipá na e di 108 konferensia Internashonal di Trabou (IAC22019) na Ginebra, Suisia, a risibí un splikashon detayá tokante e agènda i e temanan ku lo bai diskutí durante e IAC 2019. Durante e kombersashon di Skype a elaborá mas profundo riba aspektonan di kontenido, proseduranan i protokòl relevante. Pa e presentashon di PowerPoint di e señor Miyake klek  akí. E kombersashon di Skype a wòrdu fasilitá dor di un delegashon tékniko di e Konseho Sosial-Ekonómiko (SER) i aparte ku a asistí funshonarionan di SER, tambe a asistí Minister di Desaroyo Sosial, Trabou i Bienestar (SOAW) señor Hensley Koeiman, Direktor di Asuntonan di Labor señora Donate Philbert-Nieveld, ámtenar haltu i eksperto di ILO na Ministerio di SOAW señora Virlène Else, representante di sindikato señor Edward SintJacobus (Sindikato di Empleadonan den Bibienda, SEBI) i representante di doñonan di trabou señor Willem ‘Billy’ Jonckeer (Kámara di Komèrsio). E kombersashon a tuma lugá den e sala di reunion di Minister Koeiman den e edifisio di Tauber. E esfuerso di e delagashon tripartit di Kòrsou, ku lo partisipá na IAC 2019 komo miembro di e delegashon di Reino, ta ankrá den e Instrukshon di Reino di 3 di aprel 2019, aprobá pa e Minister di Asuntonan Sosial i Trabou ulandes (SZW) señor Wouter Koolmees. Riba desishon di Konseho di Ministernan di Kòrsou riba 15 di mei di 2019, a bai di akuerdo ku e instrukshon di Reino ku despues a wòrdu aprobá  pa Konseho di Minister di Reino (RMR). E liñanan di direkshon ku ta inkluí den e Instrukshon di Reino ta relashoná ku temanan importante ku lo wòrdu trata durante e IAC 2019, esta:

1. 1. Informashon i rapòrtnan tokante e aplikashon i kumplimentu di tratadonan i rekomendashonnan;
   2. Segundo i último ronda di diskushon tokante e tratado i/òf e rekomendashon pa eleminá violensia i intimidashon na boka di trabou i;
   3. Deklarashon Centenary tokante futuro di trabou.

Komo ku e IAC 2019 lo ta kompletamente dediká na e selebrashon di  100 aniversario di ILO (‘Centenary’) pa e okashon ei a skohe e tema sentral futuro di trabou (Future of Work), e delegashon di Kòrsou na Ginebra lo dediká atenshon spesial na esaki. Dor di e enbolbimentu permanente di SER den e portofolio di ‘Future Work’, i tambe den post-Centenary fase, un delegashon tékniko di SER komo miembro di e delegashon opservadó di e asosiashon internashonal di Konsehonan sosial-ekonómiko i institutonan similar (AICESIS) lo asistí na e seshonnan di Future of work den e kapital di Suisa. Generalmente AICESIS ta partisipá na e reunion anual di IAC di ILO. Pa e base di e echonan akí klek akí. Si bo klek riba e lenk aki bou, e ta transferí bo pa e blòg di señora Dimitrina Dimitrova (Deputy Director of ILO official meetings and relations department). Einan bo ta haña informashon práktiko riba IAC 2019

The Centenary International Labour Conference – what to expect