Partisipashon di SER na konferensia tokante maneho di migrashon

Willemstad, 25 di yanüari 2019 – E siman aki un delegashon tékniko di SER di Kòrsou a partisipá na e konferensia Social Innovation for Refugee Inclusion.  Migration Policy Institute Europe, European Economic and Social Committee, Mission of Canada to the European Union, i United States Mission to the European Union a organisá e konferensia akí na Bruséla. Den lekturanan, pènelnan i gruponan di trabou a elaborá ampliamente riba aserkamentu inovativo pa realisá un komunidat inklusivo pa tantu e hende nobo komo e populashon lokal. Na e konferensia a partispá un grupo internashonal di gobièrno lokal, NGO, sindikato, universidat i organisashonnan internashonal. E partispashon di e delegashon tékniko di SER na e konferensia tabata den kuadro di e preparashon pa e simposio tokante migrashon (di labor), ku lo wòrdu organisá den mei pa SER Kòrsou den kolaborashon ku SER di Sint Maarten i SER di Aruba. Durante e konferensia a hasi hopi kontakto pa mas interkambio di konosementu i ekspertisio.

Riba e potrètnan: un impreshon di e konferensia i e delegashon tékniko di SER Kòrsou konsistiendo di sra. drs. Barbara Perquin i sra. drs. Sonja Boersma, ámbos ta konsehero prinsipal.