Delegashon Tékniko di e Konseho Sosial Ekonómiko di Kòrsou a hasi un bishita di kortesia na e Kònsùl General di China

Willemstad, 2 di yanüari 2019 – Riba 28 di desèmber 2018 un delegashon tékniko di e Konseho Sosial Ekonómiko di Kòrsou (SER), konsistiendo di e Direktor/Sekretario General, sr. Raul Henriquez i e eksperto hurídiko, sra. Miloushka Sboui-Racamy, a hasi un bishita di kortesia na e Kònsùl General di People’s Republic of China na Willemstad, sr. Zhang Weixin.

SER, komo miembro di direktiva di e asosiashon,’ Association Internationale des Conseils Economiques et Sociaux / International Association of Economic and Social Councils and Similar Institutions’ (AICESIS),  lo ta e anfitrion na mart 2019 den e próksimo reunion di direktiva i tayer di AICESIS, ku ta konsistí di Konsehonnan Sosial Ekonómiko di rònt mundo. Mirando e tema sentral di e próksimo tayer di AICESIS, ’The Digital Revolution and its impact on Mankind’, i e avansenan di China den e mundo di teknologia digital, SER a haña ta nesesario pa interkambiá algun idea riba nivel tékniko ku e Kònsùl General di People’s Republic of China. Durante e bishita di kortesia a diskutí riba tantu e aktividatnan di SER di Kòrsou riba nivel regional i nivel internashonal komo tambe e metanan global i regional i e aspirashonnan di China. Konsiderando e echo ku SER di Kòrsou aktualmente tin e funshon di Sekretario General suplente pa AICESIS pa e region di  Latinoamérika i Karibe, ámbos partido a eksperensiá e bishita di kortesia komo unu masha fruktífero i inspirativo.

Riba e potrèt athuntu di man robes pa man drechi: sr. R. Henriquez, sr. Zhang Weixin i sra. M. Sboui-Racamy.