Relashoná ku CESALC

SER-nan for di region huntu na Bolivia

WILLEMSTAD, 12 di desèmber 2018 – ‘Sigui fomentá koherensia sosial (sosiedat inklusivo) i bon gobernansa den region Latinoamérika i Karibe i e ròl ku e konsehonan di konsulta sosioekonomíko por tin den esaki’, tabata e tema sentral di e reunion regional ku a tuma lugá di 3 te ku 5 di desèmber 2018 den e suidat Santa Cruz de la Sierra na Bolivia i kaminda un delegashon tékniko di e Konseho Sosial Ekonómiko (SER) di Kòrsou a partisipá.

E reunion a wòrdu organisá pa e embahada spaño na Bolivia ku kooperashon di e agensia spaño pa kooperashon internashonal di desaroyo AECID (Agencia Española de Cooperacion Internacional para el Desaroyo) i e SER di Spaña ku tabata dediká na lansamentu di e proyekto INTERCOONECTA ku ta enfoká riba promoshon di konosementu institushonal- i eksperensia i interkambio di ‘best practices’ ku bista pa realisá metanan di desaroyo duradero den e region.

Ku e reunion na Bolivia a dal e promé paso pa konkretisá e ambishon pa reaktivá e ret di e SER-nan regional (Consejos Económicos y Sociales de América Latina y del Caribe). Banda di e delegashon tékniko di SER di Kòrsou tambe tabata presente e otro SER-nan ku ta aktivo den region (sea via Skype òf nò), manera Repúblika Dominikano, Honduras, Guatemala i Brasil. Mas aleu e reunion a konta ku presensia di representantenan di órganonan di diálogo similar i instansianan importante di gobièrnu di Bolivia, Colombia, Costa Rica, Peru, Uruguay i Paraguay. E organisashon internashonal di labor (ILO) tabata presente komo opservadó, meskos ku e funshonario responsabel ku Koherensia Sosial i kolaborashon Sur-Sur di e sekretariado general di ibero-amérika.

Durante e reunion regional a kompartí konosementu i interkambiá eksperensia tokante funshonamentu di e SER-nan individual (aktivo) i a establesé un agènda pa konhuntamente atendé i elaborá riba temanan ku pa e region ta aktual i relevante, entre otro migrashon, lucha kontra pobresa, good governance i fortifikashon institushonal

Durante e presentashon di e delegashon tékniko di Kòrsou a pone atenshon riba e posishon úniko ku e islanan di estado chikí karibeño, ku ta pertenesé na e asina yama Small Island Development States (SIDS), tin den e region i riba ki manera nan por saka mas probecho for di mas integrashon ekonómiko regional. A indiká tambe riba e importansia di un diálogo sosial efektivo komo katalisadó pa un desaroyo sosial ekonómiko duradero.

A akordá pa banda di e siguiente reunion di direktiva di AICESIS, e asosiashon internashonal di e konsehonan konsultativo i institutonan similar, ku lo wòrdu organisá na kuminsamentu di mart 2019 na Kòrsou, tene un reunion regional di CESALC. Akí lo partisipá tambe paisnan di den region ku no ta miembro di AICESIS ainda. Ta trata aki partikularmente di Honduras, Guatemala i Costa Rica i e paisnan di Mercosur ku eksepshon di Brasil ku meskos ku Kòrsou ta miembro di direktiva di AICESIS.

Manera ta konosí e SER di Kòrsou no solamente ta miembro di direktiva pero tambe ta Sekretario general suplente pa e region di Latinoamérika i Karibe di e asosiashon internashonal di kooperashon di e SER-nan.

Riba e potrètnan:

E delegado di e SER-nan di region Latinoamérika i Karibe huntu.

E potrèt di grupo di e partisipantenan.

Pa mas informashon tokante e proyekto INTERCOONECTA klek akí.