Seminario eksitoso tokante Diálogo Sosial den kuadro di e selebrashon di dies aña di eksistensia di e Ordenansa di GOA

Willemstad, 11 di desèmber 2018 – Djaweps pasá, 6 di desèmber 2018, a tuma lugá den e oula di University of Curaçao (UoC) un seminario na okashon di e selebrashon di e dies aña di eksistensia di e Ordenansa pa institushonalisá e órgano konsultativo entre gobièrno, komo dunadó di trabou, i e representantenan di ámtenar, mihó konosí komo CGOA (Centraal Georganiseerd Overleg in Ambtenarenzaken).

Den su spich di apertura e Minister-presidènt sr. Eugène Rhuggenaath a infatisá e importansia di partnership riba tur nivel pa yega na un agènda eksitoso pa un desaroyo igual i sostenibel pa nos pais. ‘Un diálogo habrí pa huntu yega na solushonnan, hasi kompromiso i aktua konformemente. Un diálogo habrí entre partidonan den e CGOA lo demostrá e komunidat bon kla ku e kombenio 151 di ILO no ta un tratado sin kontenido ku sin mas a sera, pero ku aya na Kòrsou den práktika ta duna tambe kontenido i kontinuashon na esaki. Akí e Minister-presidènt a mustra riba e importansia di e órgano di konsulta bilateral, i tambe e importansia di e tratado 151 di ILO kaminda e relashon di labor den sektor públiko ta stipulá i ku for di 2016 e ta aplikabel na Kòrsou tambe.

Tambe sr. Rhuggenaath a trese dilanti ku e gobièrno ta duna masha balor na diálogo sosial – e tema sentral di e seminario – i ku su gabinete lo keda firmemente komprometé riba e ruta ya enkaminá di diálogo sosial, ku no solamente ta un bien demokrátiko masha importante, pero tambe ta aportá na ampliá e sosten pa maneho di gobièrno.

Diálogo sosial komo un medio pa krea konfiansa
Dos eksperto di ILO tabata e oradó prinsipal di e seminario. Sr. Carlos Carrión-Crespo i señor Rainer Pritzer. Nan a bai ekstensivamente riba e echo empíriko ku diálogo sosial ta un instrumento importante, tantu den kaso di un deliberashon bipartit òf di tripartit komo tambe riba nivel di dunadó di trabou i empleado, i tambe riba nivel di gobièrno i representantenan di doño di trabou i trahadó. Nan a enfatisá ku diálogo sosial ta un proseso gradual i ku mester di tempu i no mester tuma lugá den un lugá isolá. Best practices den e region di Karibe, komo tambe riba nivel mundial ta demostrá ku diálogo sosial ta un instrumento poderosos pa krea i fortifiká konfiansa  entre partidonan.

Honramentu di e pioneronan den área di diálogo sosial.
E presidente di CGOA, prof. Dr. Ing. Valdemar Marcha a trese den su spich ku e seminario ta na honor di e pioneronan di e movimentu di sindikalismo na Kòrsou, sr. Moises Frumencio da Costa Gomez i pader Amado Römer.

Pa mas informashon bishita e siguiente wèpsait: www.cgoacuracao.cw. Aki tambe bo ta haña e Presentashonnan di PowerPoint di ekspertonan di ILO.

Klek akí pa e teksto manera ta públika den Caribbean Newslink – edishon di yanüari – maart di 2019: