Delegashon di bishita serka Konseho Sosial Ekonómiko di Kòrsou relashoná ku Centrale Dialoog Bonaire

WILLEMSTAD, 9 di novèmber 2018 – Sr. Jan-Willem van den Braak i sr. Johan Breure a hasi un bishita riba 9 di novèmber 2018 na e Konseho Sosial Ekonómiko (SER) di Kòrsou.

Sr. Van den Braak ta un eksperto riba tereno di konsulta di ekonomia. For di komienso di su karera e ta envolví den konsulta di ekonomia i durante un periodo di 20 aña e ta miembro di e organisashon di doñonan di trabou/òf empresario i miembro tambe di e SER na Ulanda. Komo èks miembro di direktiva di e organisashon di doño di trabou VNO-NCW a pidié pa rebibá e Centrale Dialoog Bonaire.  Sr. Johan Breure ta koordinadó di Caribisch Nederland di e Ministerio di Asuntonan Sosial i Trabou na Den Haag i den e funshon akí e ta asistí komo Sekretario sr. Van den Braak, e fasilitadó di e proseso.

E bishita na SER Kòrsou tabata trata di e bishita di trabou di ámbos kabayero na Kòrsou i Boneiru, kaminda lo bai wak kon lo por rebibá e Centrale Dialoog Bonaire. E diálogo sosial ta un deliberashon tripartit, konsistiendo di doñonan di trabou i representantenan di empleado i gobièrno lokal na Boneiru, ku na Boneiru e yama ‘Centrale Dialoog Bonaire’.

Ademas ámbos kabayero ya a deliberá intensivamente durante un ronda eksplorativo den ougùstùs último ku partidonan involví na Boneiru; e bishita akí na Boneiru tin komo meta pa deliberá pa yega na pasonan konkreto.

Durante e konsulta ofisial a interkambiá di pensamentu mas aleu tokante e funshonamentu di e SER di Kòrsou i tokante e deliberashon tripartit ku SER ta kondusí  na Kòrsou tantu internamente komo den e Diálogo Nashonal Kòrsou ta Avansá, e metanan spesífiko di kada un di e órganonan konsultativo, i best practices.

Tambe tabatin un interkambio di opinion intensivo kon ta bai kondusí tal konsulta tripartit na Boneiru i kua pasonan ta nesesario pa esaki.

Na e kombersashon tabata presente sr. drs. R. Henriquez,  Sekretario General di SER, kompañá pa algun konseheronan di e Ofisina Secretariaatvoering SER/ROA/GOA.

Riba potrèt: durante e konsulta

Komo muestra di gradisimentu e Sekretario General, sr. Henriquez ta risibí e buki ‘Samenwerking, bezinning en inspiratie. In de (post)polder’ for di man di sr. van den Braak.