SER Kòrsou ta presente na firmamentu di kombenio di kolaborashon nobo entre AICESIS i ILO

WILLEMSTAD, 29 di òktober 2018 –  E Asosiashon Internashonal di Konsehonan Sosial Ekonómiko i Institutonan Similar(AICESIS), kaminda  Konseho Sosial Ekonómiko di Korsou ta miembro di direktiva for di 2017 i ta tambe e sekretario general suplente pa e region Latinoamérika i Karibe, a firma djamars 23 di òktober último un kombenio di kolaborashon nobo ku e Organisashon Internashonal di Labor, ILO na e siudat prinsipal suiso di Genève. Ku esakí e dos organisashonnan internashonal ta aspirá pa profundisá i ampliá nan kolaborashon mutuo pa  sigui promové diálogo sosial i  “decent work’ mundialmente.

Un delegashon tékniko di SER di Korsou tabata presente na e seremonia di firmamentu ku a tuma lugá den e ofisina prinispal di ILO, durante un seminario internashonal organisá pa AICESIS tokante revolushon digital. E seremonia di firmamentu a tuma lugá riba invitashon di e presidente di AICESIS, e rumania, Iacob Baciu. Huntu ku e direktor general di ILO Guy Ryder, Baciu a pone su firma bou di e kombenio di kolaborashon nobo ku ta trata temanan aktual importante manera, diálogo sosial, tripartitismo, e agènda di ‘decent work’, desaroyo kontinuo di partisipashon demokrátiko i e agènda 2030 den e área di metanan di desaroyo sostenibel di Nashonnan Uní (SDGs), i e dimenshon sosial di globalisashon i ‘Future of Work’.

E akuerdo nobo entre e dos órganonan multilateral ta enserá mas aleu e manera sistemátiko di interkambio di informashon i ‘best practices’ i pa huntu organisá tayernan i seminarionan ku e meta prinsipal pa ‘capacity building’ i pa fortifiká e ròl di e Konsehonan sosial-ekonómiko i institutonan similar rònt mundo ku ta hasi nan esfuersonan pa fomentá diálogo sosial. AICESIS i ILO lo sigui desaroyá kohuntamente programanan i fasilitá estudionan pa miembronan di estado i institutonan afiliá.

Durante e próksimo reunion di e direktiva di AICESIS ku lo tuma lugá na Kòrsou na kuminsamentu di mart 2019 i ku tambe lo ta  presente observadónan di ILO, lo sigui elaborá riba puntonan klave ku tin di haber ku e tema prinsipal ‘Revolushon Digital’, entre otro enseñansa vokashonal, revishon di enseñansa nesesario, e impakto di digitalisashon riba trabou i mobilidat di trabou i e ról di diálogo sosial relashoná ku esakí.

Riba e portrètnan: na momento di firmamentu di e kombenio di kolaborashon nobo dor di e presidente di AICESIS Iacob Baciu i Direktor-generaal di ILO Guy Ryder. Ademas e ehekutivo prinsipal di ILO Ryder den kombersashon ku e Sekretario General di SER di Kòrsou Raul Henriquez. Siguí pa e potrèt di grupo i riba e último potrèt: e delegashon tèkniko di SER Kòrsou, ku ta representá e region di Latinoamérika i Karibe durante e diskushon di pènel tokante revolushon digital. Klek akí pa un presentashon introduktorio di e delegashon di SER di Kòrsou durante e diskushon den pènel. Klek akí pa e diskurso di e presidente di AICESIS Iacob Baciu.