Nos manera di traha

Ora un petishon pa konseho drenta di un òf mas minister òf di Parlamento, un evaluashon di atmisibilidat ta determiná si por trata e petishon pa konseho. E kriteria pa esaki ta entre otro si e petishon ta kompletu, e tipo di petishon (si ta trata di un plan di maneho ku un impakto sosio-ekonómiko) i si e ta entregá na tempu.

Despues ta pone e petishon riba agènda pa atendé esaki den e próksimo reunion di SER, mayoria biaha ku un anotashon ku puntonan di atenshon di e Sekretariado. Ademas, esnan ku ta enbolbí ku e  elaborashon di e petishon di konseho ta invitá pa duna mas splikashon. Den kaso ku e petishon ta bini di un òf mas minister, mayoria parti ta e funshonarionan di e ministerio ta bin pa splika, tin biaha kompañá pa ekspertonan tékniko eksterno. Si e petishon a bini di parti di Parlamento, e komentaristanan mayoria biaha ta miembronan di un frakshon polítiko, sea ku òf sin asistensia di un eksperto tékniko.

Den e reunion ta deliberá riba e proposishon di lei, i a base di esei Sekretariado ta prepará e konsepto di rekomendashon. Ta diskutí e konsepto di e konseho den un reunion preparatorio di SER. Dependiendo di e kompleksidat di sierto tópiko i e deliberashonnan nesesario pa yega na un konsenso, susesivamente ta formulá un òf mas konsepto di  konseho. Na momentu ku tin un akuerdo riba e kontenido di e konseho, ta aprobá esaki den un reunion plenario di SER.

Den kaso ku petishonnan pa konseho ta relashoná ku un materia kompleho, ta instalá un komishon for di e miembronan di SER, den kua ta mantené e karakter tripartit. Ku sosten di e Sekretariado, e Komishon ta prepará e konseho pa despues present’é na e Konseho kompleto pa diskushon. Aprobashon di e rekomendashon ta tuma lugá den un reunion plenario.

E Konseho por disidí tambe pa riba su mes tuma e inisiativa pa duna konseho riba interogatorionan di maneho ku e ta konsiderá importante pa interes sosio-ekonómiko i di e komunidat. Ora Konseho tuma e inisiativa pa formulá rekomendashonnan semper un komishon ta prepará esaki, i generalmente, e ta tuma mas tempu, pa motibu di e karakter kompleho di e materia. Por lo demas e asina yamá konsehonan-inisiativa ta kana e mesun proseso ku ta deskribí aki riba.

Den artíkulo 16 di e Ordenansa di 24 di ougústús di 2017, ku ta kontené e kambio di e Ordenasa di e Konseho Sosial-Ekonómiko, ta regla e publikashon di e rekomendashonnan di SER. E rekomendashonnan di SER na Gobièrnu no ta públiko. Despues ku Gobièrnu presentá e proposishon di lei den Parlamento, ta publiká e rekomendashonnan. Solamente den kasonan eksepshonal SER por publiká esakinan despues di seis siman ku a entregá e konseho. Esaki ta sosodé dor di publiká nan riba e wèpsait di SER. Konsehonan-inisiativa i konsehonan na Parlamento si por publiká i mesora ta  publiká esaki riba e wèpsait di SER.

Mas informashon

• Kiko SER ta hasi ?
• Leinan
• Relatonan Anual