SER Kòrsou ta liderá AICESIS

Eksplorando horizontenan nobo pa 2023-2025

Willemstad, 15 di novèmber 2023 – Den un desaroyo importante pa diálogo ekonómiko i sosial mundial, Konseho Sosial Ekonómiko (SER) di Kòrsou a tuma e timon di e Asosashon Internashonal di Konsehonan Ekonómiko i Sosial i Institushonnan Similar (AICESIS) komo su presidente, efektivo for di 1 di novèmber 2023. E periodo aki, ku ta ekstendé te ku 31 di òktober 2025, ta representá un punto krusial pa SER i un logro signifikante pa e region di Latino Amérika i Karibe.

E transishon pa e ròl di liderazgo aki, guiá pa artíkulo 8, insiso 1, di e statutonan di AICESIS, ta reflehá e naturalesa rotativo di e posishon importante aki entre diferente regionnan geográfiko, manera stipulá den artíkulo 7, insiso 3. Nombramentu di SER di Kòrsou komo presidente, ku a ser ratifiká na e Asamblea General di AICESIS ku a tuma lugá dia 1 di novèmber 2023 na Mòsku, ta un muestra di e konfiansa i estimashon otorgá na SER dor di otro miembronan di e asosashon prestigioso mundial.

Kuminsando su presidensia, SER di Kòrsou a presentá un Roadmap ambisioso pa e periodo 2023-2025, dediká na fomentá prosperidat amplio i inklusivo. E strategia progresivo aki ta aliniá detayadamente ku e Ophetivonan di Desaroyo Sostenibel, e asina yamá Sustainable Development Goals (SDG’s) di Nashonnan Uní, enfatisando e nesesidat pa un enfoke personalisá i desentralisá. E strategia aki ta rekonosé e desafionan i oportunidatnan úniko propio pa e kuater regionnan geográfiko di AICESIS.

Pa medio di un video e roadmap aki a ser presentá na e Asamblea General i na miembronan di e Konseho di Atministrashon (Direktiva) di AICESIS, deliniando detayadamente ophetivonan stratégiko i un plan di akshon konkreto pa e siguiente dos añanan. Ku e inisiativa aki, SER di Kòrsou ta reafirmá su kompromiso na mehorá diálogo sosial institushonalisá na nivel mundial, konsulta, i fortifikashon di demokrasia partisipativo.

Ademas, den su kalidat di presidente, SER di Kòrsou lo fungi komo un bos koherente riba esenarionan internashonal, inkluso Organisashon Internashonal di Trabou (ILO) i Konseho Ekonómiko i Sosial di Nashonnan Uní (ECOSOC). E ròl aki lo enserá efektivamente ku perspektivanan i opinionnan di miembronan di AICESIS lo ser representá i vosiferá integralmente den foronan multilateral na nivel mundial.

E nombramentu aki ta suprayá e dedikashon di SER di Kòrsou na promové prosperidat global i desaroyo sosioekonómiko, siguiendo e prinsipionan básiko di Nashonnan Uní i e standardnan di trabou internashonalmente rekonosé i establesé pa ILO. Pa mas informashon por bishitá https://ser.cw/2023/11/10/ser-curacao-leidt-aicesis/.