Organisashion Internashonal pa Migrashon (IOM) ta bishitá SER Curaçao

WILLEMSTAD, 20 di febrüari 2019 – Den preparashon pa e próksimo simposio tokante migrashon (pa trabou) organisá dor di e SER di Kòrsou riba 9 i 10 di mei 2019 den kolaborashon ku SER di Aruba i di Sint Maarten, un delegashon di IOM a bishitá e ofisina di SER di Kòrsou. IOM ta forma parti di Nashonnan Uní, fundá na 1951, i ta e organisashon gubernamental internashonal prinsipal riba tereno di migrashon ku ta traha hopi serka ku gobièrnunan i NGO-nan. E delegashon tabata e ofisialnan di e ofisina di koordinadó regional pa Karibe, sr. Robert Natiello, sra. Marta Yolanda Gomez, i sr. Geert Custers. Tabata trata di un introdukshon kaminda ambos partidonan tabata entusiasmá pa sigui traha huntu. Durante e kombersashon di konsulta a papia riba kontenido di e simposio i e aporte ku IOM lo por duna, por ehèmpel relashoná ku e relashon entre migrashon i desaroyo ekonómiko, sosial i kultura.

Di parti di Bureau Secretariaatvoering SER/ROA/GOA tabata presente sra. Sonja Boersma i sra. Barbara Perquin.

Riba e potrèt: e delegashon di IOM i e trahadónan di Bureau Secretariaatvoering SER/ROA/GOA