Deklarashon di ILO riba Futuro di Trabou

Miembronan di delegashon di SER Curaçao komo observadónan na e debatenan

WILLEMSTAD, 27 di yüni 2019 – E konferensia internashonal di labor (IAC), ku e aña akí a selebrá e di 100 aña di aniversario di e Organisashon Internashonal di Labor (ILO) den e siudat suiso Ginebra, a klousurá ku un deklarashon nobo riba e “Futuro di Trabou”. Ei den dunadónan di trabou, trahadónan i gobièrnunan, huntu a establesé akuerdonan riba trabou desente den nos ekonomia mundial. Apesar di e delegashon tripartit di Kòrsou ku tabata presente na e reunion di IAC komo parti di e delegashon di Reino, un delegashon di e Konseho Sosial-Ekonomiko (SER) tambe a partisipá na e debatenan komo observadó na nòmber di e asosiashon internashonal di konsehonan sosial-ekonómiko i institutonan similar AICESIS. E deklarashon (Declaration on the Future of work) a sklama na doñonan di trabou, trahadónan i gobièrnunan pa e 187 paisnan afiliá pa traha huntu riba:

• oportunidat di trabou kompleto i desente;
• maneho ku ta promové trabou desente;
• un sueldo mínimo hustu;
• derechi pa trahadónan disidí riba nan orario di trabou;
• seguridat i salubridat na boka di trabou;
• trato igual na trabou pa tur hende;
• un enseñansa ‘pa bida largu’ i bon enseñansa pa tur hende;
• sufisiente privasidat i protekshon di datonan personal;
• maneho ku ta korespondé na e kambionan di e merkado laboral dor di medidanan di kambio di klima i digitalisashon, manera e plataforma empresarial nobo;
• kambionan ku ta hasi ekonomia informal ofisial;

Pa e teksto kompletu provisional di e deklarashon klek akí.
Den un diskurso di e delegashon di AICESIS a enfatisá durante un reunion plenario ku e asosiashon ta finalisando un informe riba e konsekuensianan di digitalisashon riba e sosiedat i e ekonomia, den kual a dediká atenshon speshal na privasidat i protekshon di datonan personal dor di digitalisashon mundial den prosesonan di trabou. Mas aleu, e delegashon a destaká e importansia ku diálogo sosial por tin den e lucha kontra violensia i intimidashon na boka di trabou. Konsiderando e último akí dia 21 di yüni 2019 ILO a aprobá un kombenio i rekomendashon. Klek aki pa e tekstonan.