Durante di e seminario ‘It’s the Economy, stupid’

SER ta enfoká riba e nesesidat pa atendé kambionan transformatorio den e mundo di labor riba un manera kolektivo i efektivo

WILLEMSTAD,  31 di yüli 2019 -, den un tempu di desigualdat persistente,  ku tin un impakto profundo riba e klase i futuro di trabou i riba lugá i dignidat di hendenan aden, ta imperativo pa aktua ku urgensia pa probechá di e oportunidatnan  i enfrentá e retonan pa asina duna forma na un futuro di trabou  hustu, inklusivo i sigur kompletamente produktivo i ku a skohe den tur libertat i ku ta digno pa un i tur. Tal futuro di trabou ta fundamental pa un desaroyo sostenibel ku lo pone un fin na pobresa i no ta laga niun hende afó. E pregunta ta: Kòrsou ta kla p’é?

Un delegashon tékniko di Konseho Sosial Ekonómiko (SER) a trese e pregunta akí dilanti durante e diskushon di mesa rondo titulá ‘It’s the Economy, stupid!’ , ku a tuma lugá riba djaweps, 25 di yüli 2019, den e Atrium di Renaissance Curaçao & Casino. E pènel di diskushon a wòrdu organisá pa e University of Governance  (Sr. Miguel Goede)  i  patrosiná pa entre otro, Kámara di Komèrsio di Kòrsou i MCB Bank. A asistí aproksimadamente 130 hende.

E miembronan di e pènel tabata e Direktor / Sekretario General di SER Raul Henríquez M.A., Konsehera Hurídiko Superior di SER Sra. Miloushka Sboui-Racamy LL.M., èks Minister di Desaroyo Ekonómiko Steven Martina, Direktor di Ofisina Sentral di Statistik Sr. Sean de Boer M.A., e Presidente di Kámara di Komèrsio Sr. Billy Jonckheer i empresario Sr. Renato Ignacio.

Durante e presentashon, e delegashon tékniko di SER a enfatisá e nesesidat pa un akshon diligente pa atendé e kambionan transformativo den e mundo di trabou stimulá pa inovashonnan teknológiko (e di 4 i 5 revolushon industrial), kambionan demográfiko, kambio di medio ambiente i klima i globalisashon akselerá.

E konseheronan di SER ta rekonosé e echo ku Kòrsou aktualmente ta konfrontando momentunan ku bastante reto, pero no opstante, mester dirigí e esfuersonan, den un forma kolektivo, identifikando oportunidatnan i pa probechá lo máksimo di e transformashon profundo ku ta tumando lugá den e mundu di trabou. Importashon di hóbennan  ku talentonan di edukashon haltu ku un spíritu empresarial, preferiblemente di den region, lo tin un impakto signifikante riba tamaño i dinámika di e merkado laboral lokal. Mobilidat di trabou entre e sektornan (sektor públiko, offshore i sektor privá onshore) mester wòrdu stimulá”.

Ademas e debilidatnan struktural institushonal mester wòrdu atendé riba un manera responsabel i ku koutela. Gastunan di servisio sivil ta relativamente haltu kompará ku e region, sinembargo e nivel di servisio públiko ofresé na e komunidat sivil i sektor privá ta poko efisiente i efektivo. Ta p’esei inovashonnan institushonal fundamental ta nesesario”.

E delegashon di SER ta señalá, tumando na kuenta e evolushon di trabou, ku ta sumamente importante pa garantisá ku e sistema di enseñansa i formashon ta korespondé ku e nesesidatnan di merkado laboral. Siñansa efektivo pa bida largu i kalidat di edukashon pa tur hende lo mehorá kapasidat di empleadonan pa probechá  di e oportunidatnan disponibel pa un trabou desente.”

Tambe nan a enfatisá e nesesidat pa manehonan i insentivonan ku ta stimulá kresementu di ekonomia duradero i inklusivo, e kreashon  i desaroyo di kompanianan, inovashon, i e transishon di ekonomia informal (aktualmente brutu balotá ta mas o ménos 40 porshento) pa ekonomia formal. Konkluyendo, e konseheronan di SER a enfatisá e nesesidat pa un kambio di mentalidat pa prepará pa e  trabou di futuro ku ya ta den porta “pa huntu nos mehorá nos oportunidatnan di empleo”.
Pa ulandes klek akí.