SER ta kontribuí na diálogo riba futuro di enseñansa i merkado laboral

Willemstad, mèi 2026

Konseho Sosio-Ekonómiko (SER) di Kòrsou a keda representá na nivel tékniko riba djabièrnè 13 di mei último na e konferensia “Enseñansa i Merkado Laboral den Diálogo”. Durante e enkuentro aki, hóbennan, empleado, profeshonalnan di enseñansa i representante di diferente ministerio a hiba kòmbersashon riba e nesesidat pa mehorá e konekshon entre enseñansa i merkado laboral na Kòrsou.

Punto sentral tabata ku futuro di trabou i edukashon ta pidi un kolaborashon struktural, basá riba dato i ku sosten sosial entre enseñansa, gobièrnu i merkado laboral.

Promé ku e evento a tuma lugá, tabata tin koördinashon na nivel tékniko ku SER. Den kuadro di e konseho di SER anterior riba instalashon di un Konseho pa Futuro di Trabou i Edukashon, konseheronan di SER a asisti na e konferensia pa impulsá i sostené kontenido dje diálogo

E konferensia a transmití un sensashon di urgensia na nivel di maneho públiko. E konekshon entre enseñansa i merkado laboral no ta solamente un asunto di enseñansa òf di polítika laboral, sino tambe ta toka direktamente produktividat, oportunidat pa empleo, partisipashon di hóbennan, mobilidat sosial, seguridat di eksistensia i kapasidat di kresementu duradero di Kòrsou. Empresanan ta pidi kada bes mas abilidat, aktitut profeshonal, fleksibilidat i eksperensia práktiko, miéntras ku hóbennan tin nesesidat di un sistema di enseñansa ku ta prepará nan mihó pa desaroyo personal i pa e mundu di trabou ku ta kambia rápidamente.

E balor agregá di e konseho di SER ta sinta den institushonalisá i strukturá un mekanismo di konsulta ku lo impulsá gobièrnu, enseñansa, empleadónan, trahadónan i hóbennan di manera ku nan por traha huntu riba un agenda koherente pa talentonan, siña trahando, aktitut profeshonal, desaroyo di karera i “lifelong learning”. Asina, señalnan for di merkado laboral por influenshá maneho di enseñansa mas lihé, miéntras ku inovashon den enseñansa por konektá mihó ku e direkshon di desaroyo sosio-ekonómiko dje isla.

Na mei 2026, e reto aki ta bira mas urgente pa motibu di digitalisashon, inteligensia artifisial, desaroyonan demográfiko i eksigensianan nobo di kompetensia. Un aserkamentu orientá riba futuro no ta pidi solamente proyektonan separá, sino tambe kolaborashon duradero, responsabilidatnan kla i stabilidat atministrativo. E boluntat i kompromiso pa traha huntu ku a bin dilanti durante e konferensia ta forma un base importante den e sentido aki.

SER ta apresiá e espasio brindá durante e enkuentro pa interkambio di idea i reflekshon di kontenido. Atrabes di su funshon independiente i tripartito komo órgano di konseho, SER ta keda dispuesto pa kontribuí — ku respèt pa responsabilidat estatal di e ministerionan envolví i e propio ròl di partnernan den enseñansa i merkado laboral — na un agènda sosio-ekonómiko balansá i orientá riba futuro pa Kòrsou.

Un siguiente enkuentro ta planiá pa novèmber dje aña aki. A base di e kòmbersashon ku e organisadónan, ta premirá ku SER lo haña oportunidat durante e enkuentro ei pa presentá su opservashon i rekomendashonnan tokante e tema “Futuro di Trabou i Edukashon”.